|
林清廉報 《台灣教會報》351號 1914年6月 p.6-7 原文是白話字。 現時宜蘭街的教會有幾若位來相佮，就是擺里，新那罕，武暖，按呢就較鬧熱，也較活動。閣佇兩三年的中間有加添10外个漢人來聽道理，幾若人已經領洗禮。禮拜日頂晡（上午）佇本拜堂做禮拜，平均有60左右人，中間4份3份是平埔，1份是漢人。下晡時（下午）一禮拜佇擺里，一禮拜佇新那罕佮武暖， 5所在佮怹聚集。 論武暖佮新那罕這兩所在的教會，有倚30戶，大細有百外人，現時真冷淡，無幾人欲來宜蘭街做禮拜。下晡時若去欲佮怹聚集禮拜，著逐綴厝去叫怹，有的嘴應好，跤也毋行倚。Teh聚集較常是10外人而已。 擺里的教會就毋是按呢，怹大細才有40人，iáu-kú每禮拜有20外人來禮拜。下晡時若佇遐聚集也不止濟人。較濟是會曉讀聖經。今年宜蘭街的教會頭一擺有聚集萬國同期七日祈禱會，是下昏時聚集。逐擺較常20外人；拄tn̄g彼幾日透酸風真寒，iáu-kú逐下昏有人對擺里來相佮聚集，閣有幾若的婦人人平素佇禮拜的時毋敢出聲祈禱，彼霎怹有家己開聲祈禱。真感謝上帝因為擺里佮宜蘭街這2所在的教會有略仔teh進步。請看報chiah 的相疼的兄弟替武暖佮新那罕的教會祈禱，求主幫贊，予怹閣興起。 |