一去無回 記念奉獻半世紀青春互關島 ê 陳光明醫師

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

陳柏壽撰 《台灣教會公報》 3654 期 2022年3 月7-13 日 p.25 漢羅+Ruby版台文世界 

陳醫師 ê 親友決定頂個月(2月)欲將咱所敬疼 ê 陳醫師 ê 寶體,海葬佇伊所服事近半世紀 ê 南太平洋 ê 叢林小島關島 ê 所在,伊 ê 身魂 kah 藍色 ê 海頂 ê 飛鳥做伙唱歌,也 kah 海中 ê 魚仔做伙泅水𨑨迌,伊 kah 上帝創造 ê 大自然合一,相信伊有得著安歇。
陳醫師 ê 老爸(陳芳本佇苑裡教會做牧師40年,家丁有5个囝,生活非常散赤。考入新竹中學 ê 時,伊時常佇圖書館過暝,經過艱難 ê 學生生活。後來進入台大醫學院神經 kah 精神科。1964年8月23伊 chhōa 某囝,對台灣出發欲去大約只有台北市2倍大 ê 關島做醫師,心內猶久膽膽,遐是一个生疏 m̄-bat人 ê 所在,pún-té心內想講暫時蹛3年看覓,蹛袂落去才 koh 轉來,無想tio̍h一去就是一世人無 koh 轉來,kah 史懷哲醫師欲去非洲 ê 時,kah 伊藤邦幸醫師欲去印度尼泊爾 ê 時 ê 心情仝款,kah 上帝命令亞伯拉罕向南去 ê 時心情仝款,一去無回頭。
欲去關島經過菲律賓 ê 時,海關欲將陳醫師身上所留唯一所愛 ê 彼台舊相機沒收,後來才知影伊無鋏美金10箍佇內底做hō͘海關人員 ê o͘-se。這是伊旅程拄著 ê 外口世界 ê 烏暗。真濟菲律賓醫生來關島,只是為著等綠卡,綠卡提了就離開去美國。雖然是按呢,伊進入關島以後,才漸漸知影關島 ê 原住民查莫洛(Chamorro人)實在是一群單純、親切、好客 ê 人民,in對四面八方搬來 ê 移民,lóng 歡迎接納,kā in當作家己 ê 人。對陳醫師一家人來講,真正是新koh意外 ê 歡喜 ê 經驗。In開始漸漸接納關島做in家己 ê厝,漸漸in才知影上帝備辦in來關島,做in人生頭前徛起 ê所在。In tú-tú到關島 ê 時,知影關島原住民患著「肌肉倒勼」 kah帕金森氏症(Parkinson)比率是世界第一,患者跤手倒勼無力,極痛苦。佇久長ê歲月中,陳醫師每日一家一戶去往診,真正得著在地人 ê 尊敬 kah 感謝。在地人厝裡有喜慶 á-sī 教會有節日, lóng 會邀請 in 來參加。信奉天主ê 關島患者雖然病情嚴重,m̄-koh,一般lóng 樂觀熱情好客。
陳醫師娘江榮女 bat 做過濟南教會司琴 kah 聖歌隊指揮,但是佇關島伊 mā lóng tòe 佇陳醫師身邊看護患者, mā 照顧 in 兩位年老 ê 老母,無怨無嘆。一直到今仔日,江榮女女士猶 m̄-kam 離開伊心愛 ê 關島, kah 伊 ê 先生仝款,會當講是一位叢林醫師。醫師娘ê 老爸bat參加台獨運動。
佇陳醫師ê自傳《叢林醫師回憶錄》內面有寫,伊 ê 老爸長老教會牧師陳阿本留hō͘囡仔ê一句話:「咱來世間毋是欲趁錢,是欲服事別人。」陳醫師講伊欲盡心盡力為未開發ê弱勢島民服務。晚年 ê 時,陳醫師逐日起來就是佇伊蹛 ê 附近,將伊所上意愛 ê 大王椰 ê 子,一粒一粒tìm落去塗跤。希望伊所種ê 大王椰會當緊大欉,緊開花,hō͘大王椰ê 花香,通tòe南國ê 風,吹轉來故鄉台灣。

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述