數念故陳明清長老

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

《台灣教會公報》927號 1964年2月1日 p.12 [白話字原文,改為漢羅台文]


舊年9月本報第918號有將長榮中學董事長侯全成先生的就任,佮舊董事長陳明清先生的辭任,報告予各位讀者知。

對彼霎起陳明清先生的病狀就一進一退,了後佇台灣大學治療,閣退院轉來了佇台南家己的厝裡治療,經過ia嶄然有氣色的款,可惜到前禮 拜閣起肺炎,病狀就一直惡化,到(1964年)1月28號上午2點10分就過世。

故陳明清長老是出世佇關仔嶺的望族。長成了佇長榮中學受教育,後來畢業日本中央大學法學部,閣經過日本高等司法考試及格,就佇司法界發揮伊的才能; 佇日本時代捌佇日本北海道、名古屋,佮帝國控訴院以及其他幾若位法院做判官,到光復後,有當新竹法院的院長佮台灣高等法院的推事。 Chiah-的職務攏是本省出身者罕得擔當的懸(高)的職位,通知伊的才情是真優越的。 陳長老毋若佇司法界有這款優越的表現,就是自細漢對信仰有真懸的造就,一生無變換。伊自早早就當故鄉關仔嶺教會的長老一直到死。到佇10外年前離開官界,來台南執行律師的業務,以後除去做律師替濟濟人伸冤以外,因為伊有好的信仰,懸的見識,所以佇教界佮教育界不止受重用,連鞭受聘請做咱教會財團法人的理事長,以外也擔當長榮中學的董事長,長榮女中的董事,東海大學的董事,台南神學院的董事,以外也閣有當光華女子中學,台南Y.M.C.A 的董事,聖經公會的諮詢委員,以及台南市律師公會的常務理事,親像按呢,是咱教界最重要的人物的一个。

可惜幾年來,有患著糖尿病佮高血壓,到舊年秋季病狀惡化,自按呢無通閣復原。

現時大後生(陳信憲)佇身邊照料;第二後生(陳信安)佇日本求學中,本年4月oē畢業國際基督教大學;第二查某囝美滿女士佇美國專攻鋼琴,成就非常優秀,捌佇前美國總統夫人臨席的會中演奏;(大查某囝陳美麗)大囝婿高昭仁先生,最近完成碩士學位對美國歸途中,第二囝婿是宋泉盛牧師猶佇美國深造中,第三囝(陳良夫)佮查某囝(陳美如)高中在學中。夫人(高)錦花女士是咱中國做出名的鋼琴家

nnn最近陳先生閣決定將關仔嶺家己的私有土地3000坪捐獻beh做咱總會各種靈修會會場的用地。這是一筆可觀的地產。伊有甘心奉獻,通知伊對咱總會的熱誠。 總會看伊佇咱總會的地位貢獻攏真顯著,有準備beh用總會名義佇2月7號參加或是主辦葬式。  

 

 

 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述

 

<