法師梁清水來信基督

梁吳惠經（梁坤富牧師娘），梁哲懋（牧師）口述 王貞文記述 「法師梁來信基督」見於王貞文Faceboo͘k 2013年7月5日。按: 梁清水的父親 名梁仟、母親名林親。梁清水，1881年4月16日生，1958年7月28日去世，享年77歲。18歲出道（道教道士），25歲 1906年4月4日與楊怨結婚，1927年9月聽道，1939年7月27日 尾囝梁坤富出生（在胎裏下願若是男孩獻做傳道）。梁坤富牧師，1930年6月27日生，1998年12月12日去世，牧師娘吳惠經。請參見梁清水系統表(1997)

法師梁ê老父真早就過身去，老母孤單養飼伊，生活真艱苦，所以少年時就隨人學做法師。

18歲就出師，四界去做法事，真gâu「做師公戲」，姿勢身段攏真嫷。伊koh有一項足厲害，搏杯ê時，伊會當操縱，欲愛siūⁿ杯，就會當有。所以爐主輪到什麼人，其實攏是伊teh做決定。伊koh經營香燭店，糊紙厝等等ê生理，有賺錢。

總是，伊師公戲做了愈好，畫符仔畫了愈濟，心內愈bōe平安。伊感覺這攏是teh騙人，無誠實。伊雖然是為著生活著做此途，總是伊感覺，自己無入去行過的「道」，伊是欲安怎帶領人入去？ 伊所牽ê師仔，將來mah是án-niteh騙人sioh？

Koh伊看見人死，若是好額人，就會做大場法事，總是散赤人甚至只有一領草蓆包包leh就扛去埋。這實在無公平。總是伊是互人倩ê法師，是靠大場法事teh生活。伊愈想愈未通。

後來伊開始研讀佛經，想欲瞭解世間的痛苦與無公平ê原因，總是佛經無打動伊ê心。

直到有一擺伊生phīⁿ-kha-liâm，足久攏bōe好，就入新樓病院治療。新樓病院的一位外國姑娘送他一本《約翰福音傳》。伊讀：「Tī khí-thâu ū Tō, Tō kap Siōng-tè saⁿ-kap tī-teh, Tō chiū-sī Siōng-tè.（佇起頭有道，道與上帝相與在的，道就是上帝。）」心內有受到感動，因為伊本就是道士，是teh求「道」ê人—ah！

鳳山教會歐長老真看重他，盡力招他來信基督，講福音互伊聽。總是，對伊來講，尚大的影響猶是伊自己所讀著ê《約翰福音傳》。

伊決心成為基督徒ê時，就將本來的「飯碗」槓破。道壇關起來，放棄生理真好的香燭店，將法器、法袍等等攏放hō͘ 伊ê師仔，領導伊的全家伙仔歸信基督教，搬離本鄉本地，位頭仔開始建立新ê家業。

伊無做法師，厝內無收入，好佳哉伊的婦仁人真會做事，她是一位高強大漢，腳手溜掠ê女性。In去高松用十箍銀綁田（租地）來作穡，大部份的khang- khòe是伊ê婦仁人teh做。開始的時，無厝通蹛，只有搭草寮仔。In tī彼片土地種四欉斑芝棉，等in大欉起來就成為厝ê柱仔。就安呢開始新的生活。

法師梁成為基督徒了後，koh得到chi̍t-ê châ-po͘-kiáⁿ，伊就將chit-ê kiáⁿ獻互上帝，做傳道者，此位法師梁所獻ê尾kiáⁿ，就是梁坤富牧師。

法師梁自己本身mah tī高松開拓教會，做真好的工。伊對信仰ê追揣，是對反省宗教ê虛假開始，伊有宗教天分，總是koh-kha有真正愛真理的心。

伊放棄虛假ê宗教事業來專心跟隨主，真正有sêng保羅講ê：

「góa chin-chiàⁿ khòaⁿ bān sū chòe sún-hāi, （我真正看萬事作損害，）

in-ūi góa lia̍h bat góa ê Chú Ki-tok Iâ-so͘ chòe tē it hó;（因為我掠識我的主基督耶穌作第一好。）

góaūi-tio̍h I bat sún-sit it-chhè, （我為著祂曾損失一切，）iā khòaⁿ chòe pùn-sò（也看作垃圾）,

sīài tit-tio̍h Ki-tok （是要得著基督）,lâi tn̂g-tn̂g tiàm-tī I （來長長踮佇祂）,

m̄sī ū ka-kī ê gī, chhut tī lu̍t-hoat ê, （毋是有自己的義，出佇律法的，）

chiū-sīū tùi sìn Ki-tok ê gī, （就是有對信基督的義）Siōng-tèūi-tio̍h sìn só͘ siúⁿ-sù ê （上帝為著信所賞賜的）。 」（腓利比書3:8-9）