梁阿亮長老小傳

李水車撰 「梁阿亮小傳」 《台灣教會報》第486卷，1925年9月

阿亮伯在新竹的更寮坑出世，後來徙去月眉，在hia-聽道理。到56歲的時，對偕牧師受洗禮；同年設立做長老。20年前有徙來花蓮港的軍威(Kun ui)庄耕農。當時做陣來花蓮港大細共17人而已-，今全家有43人，實在真出丁。伊在1月前有破病。到了(1925年)7月29 號就受上帝召伊離開世間。

論伊的履歷ai3寫幾若項報大家知伊的做人。

（1）伊的人款是真樸實、真謙卑，對人真親切、真有度量、歡喜做慈善的事，未曾犯官法gau5治理家內。雖然家內hiah濟人，m7 bat未曾聽見不和的事。

（2）伊有財子壽的福氣：雖然伊無真大好額，總是有相當生活，逐個子兒攏有田園幾若甲。子孫一大陣。現時有4個子、4個新婦、12個查埔孫、11個查某孫、4個孫新婦、4個查埔曾孫、3個查某曾孫、參阿亮姆共43個。子孫逐人不止有孝順命，做事業認真，thang講是守己安份的人。孫的中間有的不止有志。現時1個(梁阿湖)做醫生，1個(梁阿標)在京都同志社大學預科，亦有1個(梁雲淡)在商工銀行奉職。伊有享壽83 歲，實在不止長歲壽。有chit 3 項thang講伊有得著世間的福氣。

（3） 論伊的熱心，實在不止可取。對我來到今，若不是抵著風雨佮身体破病的阻擋，攏有來禮拜。伊有常常講道理給厝邊聽。引chhoa7 in來拜上帝，in的家內全部攏有拜上帝。伊有做長老20年久，因為目珠花才辭職；後來有設伊的大子(梁阿辛)佮第二子(梁阿海)做長老，現時猶在任。伊的第三子亦曾做執事；因為身衰lam2才歇睏。伊雖然目花，iau2 -ku2會閱唸濟濟聖經佮70外首的詩。論出捐1亦不止向前，實在真感心。

（4）論伊的葬式，是佮別人有各樣。伊未死的第先有吩咐伊子，伊若死著ka7伊舉行火葬。伊的子兒趁命令，借日本人的火葬場來燒。伊也有吩咐伊的子兒m7免煩惱，thang講是真明白的人。當日來送葬的人有百5、6人，逐人不止m7甘。伊有這款的信心，會thang得著不會敗壞的福氣。Ng3望看報的兄姊，替in家內祈禱，給伊的子孫會得著上帝照顧，對chit -tiap8起，會koh 較熱心來行天路，就是神人所歡喜的--。