廖得撰 摘自《68回憶錄》 載於《活命e5米糧》34期 1957年3月 p.44-48 。

原文用白話字，改為漢羅台文如下。

---

我學企台

Ti7彰化縣前口kap市場，或是庄nih e5店仔頭kap樹腳，我講代先，是幾分鐘久；轉來本所在，二崙仔福音堂e5會友，叫我主日著chhoa3禮拜講道理；我講：「我13歲囡仔，thai2會企台？」In講：「咱chia是入教會e5人teh輪e5,也你已經入教會；所以著kap人輪chiah會用tit！」我就揀詩kap馬太20章，以及題目：「倩工入葡萄園」；總是一下上台，頭殼gong5了了，攏亂去，m7知beh講甚mih？第二擺起就自在！

我拜著好先生

我14歲（1894年）e5年頭，教士會派一個讀3年了e5李章大學學生去水尾福音堂教小學：月俸6箍，是ti7小天堂聖人傳道，黃作邦先生所教e5小學讀過e5。雖然是24歲e5青年，人是真老成勤儉，m7-bat聽著伊一句e5戲hiauh失言！冊真gau5教！道理真gau5講！伊ti7大學e5成績，是優等生，頭二名。

梅牧師贊我kap以外5個同窗共6人kap伊讀。先生出力教，阮也盡力讀；無論看唸，閱唸是親像飛行機teh飛。真心適！先生kap學生共7人，同坐一塊八仙桌，教kap讀；一年久，先生tui3學生，m7-bat扑，m7-bat罵，也m7-bat gin5；學生若有錯，先生只有用看，學生就真驚！

我e5志氣試驗

敝茄冬仔（西螺）堂會有出一個真才調，大功勞e5受免職e5漢學家傳道，伊有著濟濟款真出名e5歌，伊有去澎湖傳道。也受加派去後山：清朝thai5（戰）輸e5時，伊ti7 hia kap會友藏山，bih ti7狹內幾若月日久，suh竹仔phut斷流出e5水過日。伊做歸本e5歌teh講hit時e5慘境；頭節，「後山e5路真歹行，十個傳道九個驚；我靠上帝e5保護，才會來到貴平埔！」

了後派轉來斗六教會，ti7 hia有步兵營e5凊飯thang拾，家族成十人，得著較會當過日。無打算教士會忽然koh批到，beh ka7伊換去社頭崙仔。伊進退兩難！某子做伙去，難生活！無做伙去，逐禮拜若beh往往來來，濁水溪埔又常在teh搶人，真危險！教士會e5批，再三直直迫。伊想講，慣例去澎湖，就無去後山；去後山就無去澎湖：今2位攏去慘過；再三去求寬限，都求無情；所以最後就寫批講：「Lin無我，無要緊！我e5某子，無我be用tit！」教士會就回批ka7伊講：「阮m7倩你！」自an2-ne傳道免職。

伊tu2著「有功無賞，扑破著賠」e5待遇，kap受著「石刀企磨，石牛貪掛」e5無體貼，以及「爛塗深掘」e5欺負。心肝激夠chat8統統，有話無當講；所以見若伊kap我做伙，無論閒話講道，攏聽著伊teh講伊tui3西教士所受e5壓迫，任職者e5刻薄，會友e5無禮：聖經逐擺讀使徒7章。題目攏講「好人受陷害。」

我14歲（1894年）年頭聽著伊teh講，心內想著救主出世ti7馬槽！傳道e5時，日無食，暝無睏！最後夭壽，孤倔無好死！也使徒保羅e5傳道：是受扑！受關！受枵寒！最後講hou7人thai5（殺）頭。若是台灣傳道e5艱苦，萬分是無in一份！若論阮e5家庭，tui3 ti7世間逐款e5艱苦，較濟攏有鍛練過。Koh我e5老母e5養父4房頭，攏無人！我e5老父4兄弟，也只有chhun我一人。當我10歲去禮拜e5時，我e5老母就發嘴口願，講beh hou7我做傳道了，艱苦快活今是無問題。設使我若會toe3主來受苦，是真榮光！設使若會為著主來死，是koh較福氣！扑算我若無hou7主救，kaN2已經慘死了！

起頭聽了信心無搖動，聽到年尾，心肝續想講：有做傳道好！若無，做當職e5也相像做主e5工！自an2-ni心志變化。

Ti7新曆12月，梅牧師到茄冬仔巡教會e5時，續問託teh hou7我提學費e5堂叔執事看贊我讀冊an2-choaN2？敝堂叔應伊講：「無路用！」了後水尾教會e5老王叔，kah我著緊緊去彰化chhoe7梅牧師；我講：聽候尾牙了，小學歇睏才去；伊講：「Be7 kiam2用tit！著緊緊去！！有要緊代誌！」我就聽伊e5嘴，去彰化chhoe7梅牧師。伊ti7廳nih teh寫字，看著我到，gong5-ngiah8問講：「Ouh-ah kiam2歇睏ah？」我講：「Boe7！」伊講：「Boe7歇睏，你an2-choaN2來？」我講：「老王叔叫我來！」我ka7伊講。「放學chiah來！」伊講。「Be7用tit！有要緊代誌，著緊緊來chhoe7你！」梅牧師講：「你無ai3讀冊houN？」我講：「ai3！ 阮先生轉去海墘厝， tu2著大水，be7當過濁水溪，我雖然落雨無柴thang拾，無食飯，我也是一人toa3 ti7拜堂teh讀！」梅牧師講：「你ai3 koh讀試看無？」我講：「出在上帝e5旨意！」

了後大家恬恬，我企企teh，就離開梅牧師轉到水尾小學。一個人行過西螺、寶斗，2條大溪，往回行過寒凊e5 12舖路。

梅牧師beh贊我讀10年久e5冊，做一年讀；一生e5學費，得著伊贊我10外箍。Tui3 chit tiap8起，上帝家己ka7我教育！

弄假成真

Ti7前年有一tin7 e5西教士到台南，請人講演梅牧師e5傳道法，ai3知伊興起教會e5祕訣。梅牧師伊e5興起教會，是tui3伊是身勇、頭gau5、心好，完全e5人！伊「識時務，」伊「知進退，」伊「信好，向望人會好！」伊所做e5,照人看，是真弄險；總是伊是teh「弄假成真！」

1. 伊beh去to2位設教，hia無人信，著直直傳到有人信；若有三幾戶信，伊就將「天國e5鎖匙」交代in：沈淪得救，攏是beh hou7 hit三幾戶負責！

2. 若看著好起拜堂e5重地，即時用私費買；免會議、免考慮。

3. 若看著人teh艱苦，即時替主來解決hit個事；Tu2著伊，是親像tu2著主：「活耶穌」

4. 伊也設立濟濟hit號第幾個姨太太做執事。

5. 伊也設立未結婚e5 19歲囡仔做彰化長老：梁秀德牧師e5老父，梁沈傳道。

6. 伊也鼓舞台灣人做牧師：用工、用錢、愛護援助。

7. 伊也鼓舞伊e5區域內（大甲溪到虎尾溪），e5教會獨立：男婦老幼，富貴貧賤；每人逐月日至少tui3獻5 chiam（錢）起，叫做補助會。