周瑞長老（1888-1965）去世

「故周瑞長老」 《台灣教會公報》965號1965年9月1 日P.26-27 [白話字原文，改為漢羅台文]

周瑞長老1888年10月19日生，1965年8月2日去世，享年77歲。附 圖像周瑞長老。

高雄三民教會的長老周瑞醫師，不幸佇（1965年）8月初 2 下午 3 點半蒙主恩召。聽著這個消息的人，大家真毋甘。 伊對三民教會創設以來就擔任長老到這陣，已經是13年啦，以前是佇鹽埕教會做長老。伊一生有獻3 間教會的土地。屬山裡的，就是關仔嶺教會，屬海墘的，是旗後教會；屬平地的，是三民教會；奉獻予主。伊佇初 2下晡（下午）3點半，去仁武納地稅欲轉來的時，高雄客運的汽車拄要發， 伊舉手欲坐車，總是車做伊發， 車khê伊的手紲跋倒，後壁輦（輪）隨時géng-著，就按呢隨時離開世間。伊是一個標準的健康者，雖然時77 歲，總是親像5, 60 歲。

佇8月初 10 下午 1點，佇三民教會禮拜堂舉行盛大教會葬。但是經費的方面喪家毋敢予教會開這條錢，怹歡喜奉獻全部的經費。 彼下晡有來賓佮會友，遺族，親族300 外人參加。拜堂內外攏坐到滿滿。三民教會有史以來頭一擺的教會葬，非常的盛況，因為故人對三民教會有真大的貢獻，所以小會有議決要舉行教會葬。

儀式的司會是董耀輝長老； 司琴，吳林玉華女士；祈禱，蘇天明牧師，讀經佮祝禱是周金耀牧師 (希伯來9:23-28)，證道是蔡逸士牧師，題目是「人生的終點，」讀故人的略歷文是陳民良先生。悼詩本會聖歌隊，以外有嘉義東門教會聖歌隊，周家內外孫合唱故人 愛吟的詩480首，「我心歡喜主踮我身邊」，閣一位故人第 6媳婦周翁綠萍女士獨唱「佇花園裡，」伊是留學義大利的名聲樂家。會眾全體有吟故人所愛吟的詩 141首，「耶穌做咱牧者」相佮數念故人。悼詞有高雄縣長， 高雄縣稽徵處長， 國大代表楊金虎長老，鹽埕教會代表何榮明長老，高雄市長代表主任秘書黃麗川先生，前的省議員故人的大漢親家，親姆等，因為時間的關係不袂當閣續落去。式煞（完），有兩台小包車，三台遊覽車，一台靈車，送到周家家己的墓地。

佇謝簡安介紹故人的略歷。 故周瑞長老， 佇1888年10月19日出世，現年77歲。 祖籍是福建省徽安縣，對清祖就搬來台灣。伊就讀長老教中學的時領洗入教會。畢業後，抱著博愛救人行醫傳道的心情，進入旗後佮台南的醫館接受英國人安禮遜（安彼得），蘭大衛，馬雅各等，3大醫生所創辦的醫事學校，第3期畢業。 佇舊城、打狗、阿蓮、燕巢、中洲、覆鼎金、三民等地開業，當時對難產及外科手術真出名。對社會的貢獻，捌當三民區副區長， 三民國校校醫，以及調解委員，司法保護會輔導員，合作社理幹事等，對社會有真大的貢獻。

毋任-按呢，對佇家庭子女的教育也真成功，6個後生（兒子）攏是讀長榮中學。

現在三個佇台灣，兩個醫學博士，一個藥學士兼國防醫學院助教，就是（長男）維新、（三男）維馨、（六男）維忠 三個佇美國，（五男）維信讀農學，（四男） 維翰是外科醫生，（七男）維賢讀政治。以外有三個千金， 囝婿有藥劑師，醫生等，一家的內面，有腦神經科，內科，外科，婦產科，耳鼻喉科， 助產士，藥劑師， 囝兒全攏成功。感謝主，上帝chiah-nih賜福佇伊的家庭。