倍加運動的目標(歐進安)

倍加運動著向甚麼目標

歐進安選 《台灣教會公報》871期 1961年7月 p.3-4


今年(1961年)第8屆總議會中有通過這條案,「倍加運動強化案」。這條議案,拍算是台灣長老教會議會歷史上最大議案。因為這條議案,是經過總會佮各中會的幹部 4日久聚集,研究準備提案,提出總會。得著總會滿場一致通過,續成立P.K.U.委員會。總會後各中會攏有開會計劃P.K.U.推行方法。又閣佇5月 2-5日,總會P.K.U.委員佮各處長、中會傳道部長,以及有關方面的人閣聚集佇台南神學院,綜合討論各中會所研究的辦法。根據這議決,各方面就欲依照這原則來推行。倍加運動的事工,毋若是台灣教會的大事業若定。世界的教會濟濟亦真有興趣佮關心,舊年美國有5差會出所費予咱開P.K.U.委員會的時,加拿大母會海外宣道會總幹事Johnson博士(約翰遜,Dr.Deane Johnson)亦來赴會,可見P.K.U.的事業是世界的教會teh注目的工作。

為什麼因端著提起P.K.U.強化案?因為倍加運動開始至今,已經經過6年外久的時間,這个期間中,各中會以及真濟教會,有做出相當的成果,總是現時對倍加運動的熱有多少下火,若無閣點toh8彼个火焰,行了100周年的時,會親像主所設的譬喻;新囝婿來的時,大家攏tuh ka睡teh睏,燈亦攏hoa去一樣。毋若按呢,這幾年中台灣社會轉變真大,譬喻來講,人口迅速的膨脹,農業化社會道德的急變敗壞等等的事實。所以若無有新的方策,著眼佇新的方面,就咱的教會欲變做時代的落伍者。

感謝上帝,台灣猶是傳福音的好機會。照董顯光博士,(前中國駐美大使)伊的看法,台灣閣50年後會變做基督教。天主教teh預想閣幾年久台灣人口的5成會變作天主教徒。以外在台灣所有的教派攏真拍拼teh傳教 。咱長老會過去捌佇台灣孤行獨市,今已經袂通獨佔天下,今日的台灣變作教派最強的區域。咱現在佇台灣猶過是最大、最有力的教派,總是這三兩年來,咱的教勢 綴人口膨脹的比例袂著,若照按呢繼續去,無久的將來咱就袂通做大哥,是做小弟。所以這个時咱著閣點toh8傳福音的熱誠,全體信徒攏相同有分佇救人的工作,咱的教會是受交代5000个,咱毋通只有趁1000 a2是2000,咱著閣趁5000,才有盡主交代的使命。

TaN咱著向甚物目標來推進?過去台灣教會對農村的開拓有相當的成就,多數的鄉鎮攏有主的聖會。又閣光復後對山地傳福音的工作亦有相當的效果。總是咱佇台灣猶有濟濟園已經熟,猶未收割,這幾方面咱應該毋通忽略。

  1. 對青年學生傳道。特別對大專的學生,過去咱的總會a2是一個的教會,實在著閣較努力。現時咱的長老會的學生濟濟teh參加別教派的團契a2是靈修會,舉一个例,舊年暑假中佇陽明山,同時有浸信會佮長老會舉辦的大專學生靈修會,彼時咱的參加者照講只有8人,總是浸信會的有百外人,而且in的出力,多數是咱長老會的信徒,這是予咱知咱對學生傳道的努力是無夠額,青年學生是將來社會教會的領導者,咱失落in,是失落教會的氣力。所以這方面教育處、青年處 以及每一間的教會,應該著真關心。

  2. 工業職域傳道,這對佇台灣是新的問題閣是當面的需要,咱必須著注目。台灣晚近最大的轉變,是teh工業化,(這同時亦是落後國家的趨勢)。佇全省濟濟所在有建設大小的工廠,濟濟人對逐所在聚集工廠地區,所以彼所在人口的膨脹真緊,這工廠區咱有忽略傳福音,總是這真要緊傳道的目標。咱的神學院有開始the指導職域傳道的科目,這新的事咱教會著趕緊研究拄好的辦法進行。

  3. 活用逐方面的人才合作傳福音。咱教會有濟濟醫師、教育家、事業家,這亦是咱傳福音真大的資本。有人講這是咱教會凍結的資本。嘉義中會有開設醫療傳道,動員數十名信徒醫師獻工、獻醫術協助傳教。In有對沿海地界,就是文化、衛生、福音落後的地方開始工作。In做了真有意義,閣有成績,所以得著國外好心人的後援。現時台南、台中中會亦已經進行這號醫療傳道。台南有30外名醫生志願白白獻工服務,教會著眼佇這新的事業真有意義。向望會閣活用教育家、事業家,a2是 婦女方面盡出來佮傳福音合作。

總是關係倍加運動有一點咱著仔細的所在就是;咱毋通只有看重數量,亦閣較注意這个方面,咱著質量並重,倍加運動毋若是量的倍加,同時是質的倍加,我亦相信無有質的倍加袂通達到量的倍加。意思是咱現在已經信的人若毋是深造予伊加添信仰、加添疼主,歡喜奉獻,感覺傳福音的責任,thai3有倍加的可能。換話來講,教會著有復興,才有教會的倍加,這點我確信是倍加運動根本的要件。