許有才談倍加運動的開動

 

設教一百週年教會倍加運動

許有才撰 《台灣教會公報》 709號 1954年 10月 p.3-4 以南部大會議長身份談之。


這屆(第13屆)的南部大會通過一个議案,就是設教一百週年教會倍加運動。主旨就是南部設教是主後1865年,算到1965年就滿一百週年,對今算起頭尾閣11 年,扣實是10年久,咱就迎接著。為著著備辦有意義的記念佮慶祝,就決定佇這10年間,著出力傳福音,建設教會,到彼時予教會比這堞加添重倍,做禮物來感謝主。議決的時,全員起立贊成,閣即時表示贊同佮感激的心,自由獻金做這个路用,120外个議員,共獻3 萬外箍,這號的表決佮這款的表現,實在是未曾有的壯舉。

想起來這是重大的決策,這个運動是設教一世紀的好的結尾,也是第二个世紀的好的開始。是未曾有的嘗試,是一項的冒險,也是一个信心。信心常常是有冒險,閣信心是容允冒險的。以下愛對這層事講幾句的感想。

1. 這是好時機的好計畫。

一百週年實在是一个好時機,值得予咱通記念。主降生到今才lím-lím有20 个一百週年。上帝予咱的教會經過一百年,用安然佮進展來度過艱難崎嶇的路徑,不論逆境,不論順調,攏予咱行佇興通佮順利的路。有講盡袂的恩賜對咱的前輩, 透到佇咱來致蔭咱。咱撿毋著感謝mah?閣咱會得有份佇這个,算是真好的幸遇,咱無人會抵著兩擺的一百週年今咱欲用啥物禮拜來感謝主。咱無刣豬,屠羊,也毋kan-ta 喊喝、鬧熱。咱是計畫佇10年內,建設加倍的教會。現時咱有150 間,向望10年後閣得著150 間以上,通做禮物來感謝主。為著這个來計畫,來努力,來活動,來奉獻,來祈禱。這个運動是每一个會友攏有份的計畫。這也是該然的運動,欲予基督的體愈長大的。

2. 有特色。

過去咱的傳道,除去初設時代以外,較常是自然膨脹。看見有會友佇遐teh聚集啦,然後才派先生(傳道先生)去駐在。甚至已經成立教會啦,iáu-kú聽候無先生通去。咱看保羅,怹是對反。是去無會友,無教會的所在傳道。怹揀相當的市鎮做中心來設教會。就是代先派人去傳道,然後設教會。這个運動就是欲親像按呢。代先選擇教會的候補地,若是適當,不論遐有會友抑無會友,也欲去設。佇咱南部4中會內,猶有90个鄉鎮講無教會。重要的埠頭猶真濟,應該著去設。

閣再來,咱的佈道是散散掖,散散播,無有計畫性。今是有計畫具體的辦法,是欲集中佇所選擇的所在,也佈道經過一定的時間,就欲成立教會。

這个運動有分做7个部門,就是推行部、財政部、連絡部、資料部、傳道部、訓育部、醫療傳道部等,teh計畫佮推進。

3. 有可能。

(1) 90年久才有150 間,若是此後10年久也想欲設150 間,撿毋是空想風譀mah?過去一年平均設無上兩間,有影是真慢,咱著承認咱的努力無夠。總是咱著知,凡事起頭難,是對佇無半間做出發的。但是現時咱有150 間的教會,有44500 个會友,有130 个傳教者,有500外个長老,有700外个執事,做咱的基礎。若每間教會10年中間努力去設一間就到額,抑是每10 間教會,一年加設一間也有。或是咱有4个中會一年合力設4間,就10年後撿毋是就160 間 mah?若有計畫,有努力,穩會。

(2) 財政按算一千萬,毋是講無一千萬就袂通建設。總是若是必須來講,也毋是咱所做袂起的。每年若有1000人歡喜每月獻100箍就有。抑是每年若有 10000人每月獻10箍就有。財政組會替咱想,予咱好奉獻的路。閣這10年久,因為愛財力集中佇這个運動,有停止既成教會起拜堂向別教會募捐的事。咱但有努力,毋是做袂到的事。

4. 毋通袂記得的。

不過謀事在人,欲予伊成是在耶和華。其實這个事耶和華便便的意思欲共咱成。只有是teh聽候咱計謀而已。咱著祈禱上帝,幫贊咱全體的兄弟姊妹,攏同一个心志,會為著上帝計畫大的事,會協力為著上帝做大的事。著求啦。

「耶和華矣!求你佇遮的年的中間閣興起你的所做;佇遮的年的中間顯現」(哈巴谷3:2)。