賴仁聲論倍加運動

論倍加運動 (P.K.U.)

 賴仁聲撰 「Khia7 tiam3初代教會的精神來看現在的 P.K.U.」《台灣教會報》815卷 1956年11月 p.11


Boe7講這題目,事先ai3先ka7眾同工kap眾兄姊請安kap恭喜,續同心來感謝上帝。因為咱是甚麼等號人,堪得hou7天父交代咱做chiah大的工。而且伊有幫贊咱逐漸 na7 teh成功。 TaN已經經過兩年lah,時過境遷,咱的目標永遠無過換,若是咱的方法依照時機環境的變遷,自然無適合的著放去, khah好的咱著採取。TaN依照過去的經驗我佇遮來講幾句 hou7大家做參考。

請來看開拓總本營耶路撒冷精神(行傳 2:1-4:4)

  1. 迫切祈禱,等候聖神降臨,逐的工人受聖神充滿了後chiah出發。

  2. 逐的同心協力。前線的傳道者使徒無攔-chah8上帝的榮光,無減少上帝的話,照主所交代in 的好膽來傳來行。 後人,兄弟姐妹無毋時常同心祈禱,關心前線使徒的工作。也盡所的捐獻,有無相通, hō͘全會團結 佇主疼的內面。

  3. 把握宣揚福音的真諦。彼得講:"金銀我攏無;獨獨我所有的 hou7你,佇拿撒勒耶穌基督的名你起來行。"

現在的工人,我本身也在內,會友也是抱這的思想,就是開嘴,想代誌,第一就是對錢講起。無錢毋免講。若是彼得是講金銀我攏無;所有的只有"耶穌基督的名。"實在,"耶穌聖名至貴至寶,世間無名thang比,"又koh是"世間珍珠,寶玉,金銀,攏總毋值耶穌。"列位一的鄉, 鎮長的名佇鄉鎮內多真有力量。若縣,省長的名kiam2 毋是koh-khah有力量。到佇一國的元首總統,皇帝就真正毋是an2-ni講。你想咱奉主的名去做事,甚麼事的做不通 ah?咱常常忽略這個事,只有teh想錢,錢是第二,第三尾溜仔的事。第一要緊是咱e7得用主的名hoe7對方起來行a2 be7?不管對方是甚麼等號的 be7行。是破病倒佇床裡的 be7行mah?是人格的破落戶,靈性的半遂mah? A2是守錢奴, hou7世間的物質縛腳縛手為一chiam錢來笑,為一chiam錢來哭的錢奴 mah?不管對方是為怎樣bē行,咱有把握thang khiā tī伊的面前kā伊講, "我奉耶穌基督的名,你起來行。" hit個人若e7應聲toe3你的嘴就起來, tio5跳,也行也走,來toe3你相kap o-lo2主,若e7 an2-ni你毋免驚事做be7成,也毋免驚人阻擋,的確會成功。

對以上這三點,受聖神充滿,逐的同心協力,工人有把握宣揚福音的真諦。 An2-ni就e7排開萬難來開拓建設當初的總本營耶路撒冷的教會。


賴仁聲撰 「論倍加運動 (P.K.U.)」《台灣教會公報》839期 1958年11月 p. 6-8

主筆李牧師(李嘉嵩)講本月欲出咱台灣宣教進展的特刊;叫我寫論P.K.U.的事,今我照所吩咐來寫幾句佇遮,來論起P.K.U.的過去,現在,kap將來的望展。

1、論P.K.U.的過去。

P.K.U.這个名對咱已經毋是新的名詞 lah,已經是咱一个真熟似的名詞。而且是咱眾人所關心,注意teh看的目標才著。總是為著事是遮爾關重,所以咱毋通有一刻久的疏忽。咱應該掠伊做新,又日新,日日新,來記得才著。

2.、P.K.U.的起源kap意義。

  1. P.K.U.的起源是對A.D.1954年7 月初 5日,第13 屆的南部大會,聚集佇台南神學院的舊禮堂。佇議長許有才牧師的領導下,倡議一決來發足的事業。

  2. 彼个意思就是講南部設教是對A.D.1865-1965 的 6月止,tu2-tu2 是設教100週年。按呢佇彼个100週年的紀念日若到的時,咱有甚物通做芳芳的祭,來獻佇上主的面前抑無?想來想去就決議用教會倍加來獻予主是第一好的果子。

  3. 「教會倍加運動」本來真的意思毋是講拜堂的建物倍加,是講人數的倍加。意思就是欲鼓舞會友一个招一个,這款的信仰復興,救靈的大運動。教會堂加重倍,這是便宜上按呢講,人較快理解。

著手彼年tu2-tu2是A.D.1954年7月,ān到100週年A.D. 1965年的 8月,tu2-tu2是猶11年。咱普通攏是講10年,也講佇這10年中,教會運動欲對150 間予伊進到300間。這是當時的目標佮意思(實在數是149間,到298間才著)