董群家牧師新加坡通訊 （1968年12月）

董群家報 「海外宣教師通訊」《台灣教會公報》 1043-1044合刊號 1968年12月15日 p.26 [白話字原文，改為漢羅台文]

按：董群家牧師為台灣基督長老教會海外宣教師，自1965年12月至1969年12月間，牧新加坡正道堂。參見董群家傳道生涯回憶錄 6. 星加坡教會時期（1965年12月- 1969年12月）。

所數念故鄉教會的兄弟姊妹，聖誕恭喜！

若準昨日才離開台灣，總是目一瞬已經過去3年啦。阮全家非常思念故鄉主內兄弟姊妹，也毋捌無一日袂記得台灣的聖工來祈禱，相信大家佇天父的照顧下面攏平安。

阮佇遮也得著主的扶持佮各位兄姊的代禱，聖工有順序咧進步。因為工作無閒，袂通常常寫批共大家請安，真抱歉。今得著教會公報社主筆的好意，佇遮將小弟佇新加坡正道堂的工作向各位報告。

新加坡是佇赤道北爿約85哩，馬來半島的南爿，面積約220平方哩，人口約200萬，是東南亞最大的商港。佇遮無四季的分別，規（全）年攏是熱天，佇遮也無地動（地震）佮風颱。人口的 80%是中國人，其他有西洋人，馬來人，印度人，所以佇遮蹛較久的人攏會曉講5，6種的言語－咱的國語，廣東話，閩南話，英語，馬來語佮印度話。最普遍的話是閩南話；因為按呢咱台灣人來遮旅行出入攏真自由，因為言語會通。向望兄弟姊妹揣機會來迌。

阮的教會正道堂是佇新加坡較郊外的住宅區，會友160戶，禮拜人數約200名，是閩南話的長老教會。禮拜日有禮拜，主日學，少年團契，其他週間有祈禱會，家庭禮拜佮青年團契，婦女會等的聚會。逐項的聚會方式攏佮咱台灣教會相款。

今年阮有起（建）一棟的「令典紀念館」做主日學教室。這棟厝是欲記念正道堂創設者故陳令典牧師來起的。此後主日學有課室通分班教學啦。令典紀念館內，也有設圖書室通予會內青少年人讀冊。

阮每年有舉行2擺的洗禮，今年上半年有成人12名領洗禮，6名堅信禮 (入教會)，小兒洗禮9名，總共27名進教。下半年的洗禮欲佇12月舉行。

阮雖然有盡力來做工，總是真軟弱，深深感覺辜負主的疼，向望敬愛的兄姊，佇祈禱的中間記念阮，為著阮佇海外的聖工來代禱。願台灣的海外宣道事工，日日進步，榮耀主的聖名。