黃仲執事 (1882-1930)

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

「黃執事的小傳」《台灣教會公報》544號1930年7月 p.3

按:黃仲 (1882-1930),於1910年在台南太平境教會受選為執事,1920年6月被選為東門教會的執事,而轉籍到東門。


黃君名仲。台南東門教會的執事,新樓冊房印刷部的主任lah。原籍是北門郡,佳里庄,埔頂寮黃姓的大族。當明治36年(28年前, 1903年),來新樓共甘牧師(甘為霖,Rev. william Campbell)做工。因為伊溫純勤勉,不止予甘牧師謳咾,才舉薦伊入冊房做抾字印刷的工。對按呢才搬請伊的老母來蹛台南,建立家後,紲接到這霎,欲到30 年。

黃君對受甘牧師用道理引chhoa7了後,就放sak伊以前假的信仰,專心來歸服佇主。因為伊所做的工,也比別人加得著濟濟道理的教示。每禮拜日就幫贊東門教會主日學的工,後來紲任東門教會的執事。

不幸佇今年(1930年)5月尾染病,1日1日較重,後來檢查,知叫是染著「腸窒扶斯」(Typhus)的症,就去入台南醫院,因為有1个查某子,佇彼醫院在職,通利便來照顧伊。 總是主的旨意已經成,愛歇伊世間的工,所以人的精神,藥的氣力攏無功效,紲佇 6月23日午後7點離開世間。予主引chhoa7入天堂,享壽48歲,放下繼室佮囝兒10人。男6个,女4个。伊的大公子現在佇奉天滿洲醫科大學讀冊。大令嬡佇彰化基督教醫院任看護的職;也次令嬡佇台南醫院做看護;其餘4个猶過佇公學校;也有的細漢佇家庭,攏未婚配。

照咱知伊的做人,有幾若項可取,就是樸實忠厚閣勤儉。伊做人真樸實,是還是,非還非,無用奸詐的步款待人,也真忠厚,所以佇遮欲倚30年無聽見朋友嫌講甚乜事。閣真gau5勤儉。 伊有9个囝兒,照看是較有受拖累,總是伊勤勤儉儉來引chhoa7眾囝兒,所以對佇經濟上毋若無打擊,反轉是悠遊自在,已經培養3个囝兒入社會可以自立。可見若願肯勤儉,盡力來行,無論甚乜為難的關隘,都可以扑破。 今請看報相知的朋友,替in家族來祈禱,予in 將來計劃順序,會紲接來做主的工,通榮光伊的名。

 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述