黃秋茂招待參觀秋茂園 (1968年7月29日)

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

「黃秋茂倒來台南招待教界人士參觀秋茂園」《台灣教會公報》 1035號 1968年8 月 1日 P.13~p.15 [原文是白話字]

秋茂園是留日臺僑黃秋茂博士所建,原設於仁德鄉,後移建於台南鯤鯓海邊的木麻林區中,地5甲多,1968年5完工開放。[他另建一秋茂園,位於苗栗縣通宵鎮北方5公里的新埔里社區內,1971年所建] www.tcll.ntnu.edu.tw/pojbh/script/artical-11543.htm


為著建設現代的伊甸園,予人類享受上帝所創造大自然的美妙,以及食豐盛的果子,佇31年前對台灣去日本做生理的黃秋茂先生最近對日本倒來台灣,(1968年) 7月 29日佇台南招待教界人士約100外人去伊私人建設的秋茂園參觀遊覽,同時也有招待拄來台灣培靈佈道的日本基督教訪華團的團員來秋茂園相佮交陪親睦。

黃秋茂先生佇這日的招待會中,有講起伊個人的見證,佮建設秋茂園的目的。伊講:伊出世佇一個未信者的家庭,5歲的時老母就過身去,伊的老爸為著教育栽培囝兒的緣故,攏無閣娶後母。當伊入公學校2年的時,開始去赴主日學。黃先生講:起頭伊赴主日學最大的目的是分媠媠的聖誕卡片佮參加教會節期的慶祝 會,對教員咧教冊抑是咧上課的時,伊攏無咧聽,有時真歹規矩。總是以後伊對先生所咧講的聖經故事不止有趣味,特別關係上帝創造伊甸樂園的故事予伊的印象最深刻。彼時佇伊的心內不時咧想,設使佇世間若猶有親像伊甸園彼款的所在,見若園內的果子攏通自由挽來食撿毋是真好?若是按呢,無論偌nih散凶(貧窮)的囡仔,就攏有機會通享受上帝所賞賜人類的果子。

後來黃先生佇16歲的時就離開台灣,去日本北海道做生理,專門運魚油來大阪賣,也佇大阪家己經營灰曹工場。黃先生講:做生理趁錢的祕訣,就是在佇會曉認識機會,把握機會。所以伊講,佇伊做了有趁錢的時,伊就計畫使用金錢的方法,將所趁的錢佇市區買土地,建置不動產的財源佮經營事業的基金。戰後,都市復興,一切的建設攏真欠用土地,所以對佇買土地以後,有趁真濟錢。

黃先生佇日本趁大錢了的時,伊就真數念故鄉,向望倒來故鄉迌,探訪親人朋友,同時買一台當時佇日本最新,最流行的收音機佮真媠的膨椅欲倒來送一位佇細漢的時真gâu疼伊的阿婆詹瓜(Koe)姊妹。黃先生想講這位阿婆若看著遐爾媠的收音機佮膨椅,一定會真歡喜才著,總是當黃先生佮疼伊的阿婆見面的時,阿婆頭一句就問黃先生講:「你有常常去禮拜仔無?」黃先生對這時起才想著,伊去日本已經有10外年久,無閒做生理,致到攏無去禮拜啦,心內毋知欲按怎應才好,同時予伊醒悟阿婆對佇上帝的疼的感動才遐爾疼伊, 關心佇伊的靈性生活,也深深知影基督教是世間上好的宗教,所以阿婆一世人才攏無放拺,閣佇逐禮拜攏去赴禮拜。黃先生講,對彼擺了後伊閣去日本做生理的時, 就攏去教會禮拜啦。

佇5年前,伊為著欲實現伊佇主日學時代的理想,伊就佇故鄉台南市附近的仁德鄉開始用5000外坪的土地建設「秋茂園」,佇園內種逐樣的果子,果子若成熟的時,就免費予來園內迌的人客挽起來食。伊真向望通過這個自由的樂園, 予人想起上帝早時創造伊甸園的時代的生活,以及上帝對人類的疼痛。黃先生這回倒來台灣的目的是欲看伊5年來佇秋茂園所建設的結果,以及計畫新的建設,予這個樂園漸漸成做人間的伊甸園,予眾人佇遮閣一擺想起上帝的疼,也用按呢來疼別人。

 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述