黃茂盛撰《台南府城教會報》170卷，1899年5月

---

Ti7西曆1897年頭蘭醫生（蘭大衛，Dr. David Landsborough） ti7彰化設立醫館，到今有兩年外。可惜ti7彰化iau2 boe7有所在thang hou7病人toa3,不過暫且用拜堂邊e5厝做逐日看症發藥e5路用na7 tiaN7。也ti7大社有創一個所在thang hou7 30外個破病人toa3,是因為彰化熱天真翕，先生愛避暑hia,也thang續醫病來利益人。差不多通年8月日ti7 chia,4月日ti7大社。我有聽見醫生講這兩年外除出去看e5以外，來就醫e5人ti7彰化有2291人，ti7大社有1358人；計共3649人。Chiah e5人扯勻 逐個有來差不多4、5擺， in較濟是做穡人。In e5病較濟是腳疼，目睭疼、寒熱症。也舊年有動刀法 e5是379人。

也逐日有講道理hou7 in聽，不論是ti7 chia抑是ti7大社有得著周先生孝希長老kap幾若人e5幫贊。雖罔hiah e5來醫館e5人，無攏總逐禮拜日來禮拜，m7 ku2 thang向望in較知耶穌e5道理是甚mih款，也別日beh發生到結實。總-是一項thang hou7咱台南屬e5會友因為彰化來感謝上帝。Tui3梅牧師（梅鑒務，Rev. Campbell N. Moody）蘭醫生來彰化到今，hou7 主e5道理一發開闊。主e5名聲一發播揚。因為牧師盡心力，傳主e5道，不論時，不論地，溫純引chhoa7,迫切教示，掠家己做奴僕。醫生抑是an2 ni thang權達變，無固執法度，疼主、疼人，無要緊本身，不論三更半暝，不論路遠、路近，若有緊急e5病症，來請伊，伊liam5-piN kap伊去醫。所以去外面醫，是救真濟人免死。若tu2著病傷重e5人，be7醫tit,不論是面歹看，抑是臭爛歹味，無人敢看敢倚，醫生就講：「咱e5心比che較歹。」伊就講道理讀聖冊hou7伊聽，致到hou7學生受感激，趁伊e5款。這是大略講in兩位e5先生hou7 lin thang歡喜感謝上帝。若beh講到了是真濟，親像我本身受in e5感激來得著真大e5利益。

Koh一項著求上帝hou7 chia有所在thang hou7病人toa3,較有機會thang hou7 in bat道理kap白話字，續望hiah e5 就醫e5人將所聽見e5道理囥ti7 in e5心來就近主。

也一項感謝上帝有聽咱祈禱：「鹿港、東大墩（台中）有設立聖會。Koh著求上帝hou7 in那興旺、那開闊。也著求上帝hou7 牛罵頭（清水）、梧棲、茄投（龍井）hit勢e5人有聖會。因為梅牧師kap一個兄弟（楊）福春兄去hia講道理，真好機會，ti7牛罵頭（清水）有稅一間厝做歇腳e5所在，是（楊）福春兄toa3 ti7 hia逐日四界講道理，逐禮拜有10外人定著teh聚集。Tui3 hia過入去聽 e5,有時10外人，有時20外人。也koh番挖（芳苑）hit勢e5人也真濟，咱著求上帝hou7大學那濟人愛去讀，免tit欠工。

　

　

 首頁Home/ 本土信徒總檔 / 教會史話總檔 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述