郭朝成牧師：論伊的傳記，伊有家己寫叫做《傳道行程》，出佇《天橋》，可惜我只有看一屑仔nā-tiāⁿ，所以袂得知伊的詳細，不過我是欲講我所知，所尊敬的nā-tiāⁿ。
1. 伊是樂觀的人。
伊的樂觀是得救，赦罪，做上帝子女的樂觀；毋是世俗的享樂，kan-ta想食，穿，嫖，賭，飲的罪惡快樂。伊佇神學校，是比我早兩年( 1906-1910)，in彼年五名攏是優秀的，就是趙天慈，潘道榮，蕭文德，李文前，郭朝成，一人有一款的特色，有一款的性格，一款的信仰，所以伊的成功自然無同。郭牧師伊的信仰是單純，是純正的，是十字架的福音，做上帝的後嗣，對按呢伊是樂觀的人，罕得看著伊憂頭頭結面， 毋捌悲觀，驚惶；不時笑gi7-gi7，真gau5講古；伊一生不偏，不黨。凡事感謝，凡事忍耐，吞忍。伊是和平的人。伊的面貌真漂亮，女子欣慕的是真濟，若有 別人teh欣慕的，伊就讓人。所以是不鬥不爭的君子。伊家己和平，也予人和平。
2.勉強家。
佇學裡是碌碌過日的人，畢業了，對漢文大進步，常常投稿，彰化的崇文社常常入賞，也捌得著一等，因為伊的文清，理徹。俗語講：「娶某冊毋讀，嫁尪跤毋縛，」所以濟濟人，讀冊是teh為著試驗，為著畢業證書，若畢業了，所讀的就還學校。若是郭牧師是畢業了才奮發勉強，佇傳教者中，伊的學問是算有著。
3.是經濟學者。
祖產有淡薄遺產，伊攏予伊的小弟，畢業了帶教會，只有夫婦兩人，毋na7伊無帶金錢，伊的夫人也無妝奩。當時一月日傳道本身領8箍，婦人人3箍。有人婦人人死，教士會就共扣，（彼時是教士teh發薪津，講好笑，講傳道死某，教士會也teh扣，其實是扣3箍），後來又人講：死某都teh悽慘，閣共扣3箍是無情，後來就無扣，閣後來講婦人人領薪水無通，才廢止，一个起碼算11箍，有某無某攏相像，加一个囡仔，一月日加1.50。照算，若5个囡仔，共領 18.50；佇少囝的時，郭牧師粒積400箍借好朋友，30年久，無母無內，後來猶原有還400箍，對我念講當時借伊400箍，是糴得六千斤粟，還的時糴無兩升米 (借佮還)，我毋在年kō，若照我的記憶來講：若佇1915年400箍糴得兩萬斤粟，若到佇1949.6:1，4萬箍換一斤的進前，400箍是偆這sian2 ；通講攏無去。到囡仔出頭，5个查甫攏大學，5个女的攏受高中教育。列位，恁想祖產遺產棄權，400箍借朋友，無利息，也無討的人；thai2有 錢通栽培子女，佇遮就是伊的經濟學lah。 伊無做生理，無副業，應該領的以外，伊無別路的收入。到底伊按怎teh經濟。
對青菜攏毋免用錢買，是對上帝的配給，逐項菜攏家己種到食袂了，猶有通分會友。對魚，肉in是不斷，猶是罕得買。 彼是按怎？ 較常是拜六買魚佮買肉，持防禮拜日若人客來就利便，閣禮拜日有會友會來看先生食飯都也有chhiN-chhau，若是家己真儉，寬寬配到拜五，六才配了，才閣買新的，大部分青菜用較濟。對衣服：出外若倒來，衫連鞭換，一軀寒，一軀熱，穿得規世人。人teh流行，伊無，我teh穿短手ng2 (南風服)，伊也笑我講：「王的，你也teh激少年。」為著伊按呢儉，所以伊的囝逐个真儉。彼時囡仔若讀長榮，食佮蹛一年一百箍開袂了，無納授業料， 食一個月9箍，蹛三箍，半價是6箍，一年10月日60箍，冊佮制服是大漢的予細漢的接，換新的是小寡。人teh食魷魚，鹿肉，叫伊的囝買5仙果子來咬；人teh食，咱也teh食；人喙teh振動，咱也teh振動。伊的囡仔攏得著上帝祝福，攏優秀，佇附近讀攏是省立的，毋免讀私立。讀省立佮私立一年差不少， 毋na7按呢，閣通得著獎學金。佇台北大學的時，閣得著牧師的紹介，有的佇教會活動，有的介紹做家庭教師，食，蹛攏免錢；所以伊常常teh講：讀大學紲比中學較省。
伊對金錢有知足，佇學裡就念，伊若偆上一千銀就到額，我問郭的，taN一千銀袂？應講，taN的錢，若人teh燒的銀紙。伊也真畏錢，我常常teh募集錢，嘉義中會的慈善會，新樓病院的後援會，也是從事員，to2位起拜堂就叫我共in題，伊定定共我講：王的，你無論去到to2位，人攏驚講：題錢的又來 lah。我thai2會欲擔任這，毋是有抽分，抑是拈捻，是報人有份這个恩惠，積聚財寶佇天裡，所以我毋是愛做，是無推辭。郭牧師伊看金錢的魔力真大，會得無交插是較好。但是伊奉獻是真甘，我欲題錢到伊遐，我毋捌對伊募捐，只有講我來的目的，伊隨時提30箍，抑是20箍來奉獻；閣一項，人欲共伊借300箍， 抑是500箍，伊較常提30，抑是20箍予伊講：500箍我無，只30箍送你，按呢心較平安，有做好事，也毋免掛慮500箍予人倒去。
4. 伊教子有義方。
三字經講：「人遺子，金滿贏，我教子，惟一經」，意思是人留規櫃的金予囝，若是我是教囝只有一本經冊。所講的經是指易經，書經，詩經，禮記，春秋；咱有較寶貝的經，就是新舊約聖經，是上帝默示的經，有利益佇教示，佇督責，予人歸正，引chhoa7人學義理，予服事上帝的人練達，便便來行攏總的好事(II 提3:17)。
郭牧師按怎教囝，是用聖經，就是主的警戒佮教訓來培養in。近來學校的學課真急，真濟家庭紲無致意禮拜，父母關心學課，學校的成績，無關心佇靈命。郭牧師致意靈性的較要緊學校。早起時無禮拜，無食飯；暗時無禮拜，無去睏；若慣勢就毋是重擔，伊若赴無著禮拜，也家己讀彼cham7聖經，讀了會好睏，有時睏一醒 才想著伊的昏無禮拜，著起來家己禮拜，就真好睏。教囝著會記得，雖然是咱生的，猶ku2是上帝交代咱培養，著予伊捌天父，信救主。
伊對囝兒媳婦是親像人客。佮大囝相佮食，一月偌濟米，偌濟菜錢，無ham3-ham3，父母食囝是應該，伊無愛連累囝，因為伊有獎委會一月日6斗米 通領，伊佇霧峰教會做工，教會也有予伊，物件也隨人用，伊真明白。對按呢伊的囝攏是教會，社會的棟梁，大的(東榮)，第三的(東輝)，攏做有為的牧師，第二的(東耀)做霧峰正豐化學工廠的技師，第四(東煥)，第五(東明)的做中等學校的教員。
有人攏是將本身做標準teh教示伊的囝，所以親像行坦橫的毛蟹母，當然教毛蟹囝行坦橫。 郭牧師，伊毋是用家己，是用主的警戒佮教訓來培養in ( Hut 6:4)。參考創18:19講：著命令伊的囝佮家眷長長守耶和華的道理(也看申4:9, 6:7, 11:19;詩 78:4；箴19:18, 22:6, 29:17；II提3:15)。人若用上帝的真理來教督伊的囝，伊的囝就欲予你安心，予你歡喜；到老也無歪chhoah8。
家庭教育做好就是守家庭禮拜；夫婦，男女，少兒攏聚集，不論甚麼工，會歇得的攏歇，吟相像的詩，讀相像的聖經，齊讀，雖然有甚麼無稱意的事，抑是甚麼鬱卒，會改世間苦痛憂悶，予人福氣滿滿，做一日的原動力。
細囝照伊的年歲，照伊所會的工作，攏分工予in做，掃廳，掃房間掃埕，筅椅桌，揉椅桌，對4歲就訓練起，隨人的物隨人收囥，別个愛用愛共伊借，父母也毋通替伊主意，會通替伊借，毋通用命令。物若用了閣勸原位，別人毋免揣物的麻煩。的確無溺愛，無偏愛。
我順機會報咱知一个實例，就是佇20外年前，東京都的不良少年，少女有13218名，其中有父母的最濟7084个，無父的2050，無母的是 1764，無父母的1394，養母的455，養爸的331，其他100。照這个比較看，有父母通教示的不良煞siang7濟，這通知是溺愛佮偏愛。 毛蟹母teh教毛蟹囝。郭牧師是chhoa7子女就近主。大家會記得子女是上帝賞賜的，咱愛好好chhoa7 in歸佇主，毋通虐待，毋通轉賣別人。
5.夫婦愛情真深。
伊gau5 疼婦人人，也是好某命，自然是耶和華賞賜的前妻蕭氏(蕭雁)實在是難得的女子，對丈夫真gau5幫贊，對囝真gau5整理，毋敢勞煩丈夫的祈禱佮傳道所以郭牧師看著伊遐無閒，伊共伊鬥做，呼轄遮的囝共老母鬥跤手。勇健的時較無看出伊的愛情，佇患難的時才看見婦人人欲生產頭上囝，無序大人佇身邊，兩人攏未捌經過 大事閣拄做大水，厝攏入水，無眠床通生囝(佇岡山)，著坐竹排去高再祝醫生遐生，腹肚ji7疼，大水ji7 驚，郭牧師扶插牢牢，對上帝祈禱， 對產婦安慰同情。也得著高再祝先生in夫婦非常的照顧好款待。閣一擺佇和美，婦人人無拄好跋倒，喙齒摃斷幾若支，郭牧師看一見，非常的毋甘，袂食飯，著用毋免哺的流湯質予伊食。遮好的賢妻紲予上帝召伊轉去(蕭雁於1934年1月19日去世)，10个囡仔郭牧師thai3有法度通io，所以著續絃，得著捌做女傳道的嫁予伊。 新牧師娘(郭芸)對傳道的苦杯有試過，歡喜來幫贊郭牧師，所以將10个囝的擔就交代續絃。 陳氏經過真完滿，無拍算婦人人身軀毋做主，致胃下垂袂食，自然就袂做工。事先有查某囝通做，後來郭牧師著體貼夫人，早起時著伊煮，予婦人人睏較晏，猶原歡歡喜喜來做。感謝上帝，佇這个胃下垂22年久，後來人報用藥縛肚臍來灸，灸了就好，gau5食飯，就勇起來。無拍算換郭牧師致病，牧師娘勇lah，會服事牧 師到仙終。
6. 好古松。
有人種花是欲趁錢，有的是欲看水，有花紅柳綠真水，有的真芳，若是古松無色緻的水，也未會芳，松仔若予伊自然是真強，伊雖然倚佇甚物樹，若伊的根貼著地，無久彼叢樹就予伊佔去。郭牧師伊共栽佇花跤有限的土，會活，未通照伊的野性發展，著照人的意思共伊tiau lêng，tiau hōng，tiau lâng tiau 古董；有時葉做一下共挽起來，親像死的，予伊閣發才會小葉，才會媠；伊種有幾百盆，有的真有價值，一盆值得幾仔百箍，伊毋捌賣。我想伊的心成就這款，用人力助天公，松是霸性，伊用花跤共貯teh，親像用耶穌的規模共伊約束，共刁督，是用上帝的境界佮教訓，予伊歸正學義理。挽伊的葉，是共褪去舊的行做，換新的，發幼幼軟軟成做古錐。所以伊對伊的子女，對教會幼兒，幼稚園，主日學，少年團契，青年團契，伊的用工也按呢，「玉不鐲，不成器，人不學， 不知義。」伊對從前，台灣算有著，伊的家庭教育，伊的牧會也有成功。
7.伊的友誼是誠實.
我常常去拜候伊，伊常常對伊的囝兒、媳婦講，阮這是50年的好朋友，是同志的，是刻苦耐勞的傳教家。
佇1930年的5月12日，家母佇彰化醫館入院中過身，我佇埔里，當時無自動車，我出來赴未著送葬，買壽板，扛，埋，地點，攏郭牧師替我設法；若毋是知己，伊那欲按呢做，穩當著睏咧聽候到我到，著萬一日，彼時伊佇彰化教會做傳道。
閣我欲離開水里坑教會，伊直直鼓舞我來大理教會，彼時伊做小會的議長，通替in設法去拜堂。
伊真清白，伊決心毋共人借錢，雖然捌真欠缺的時，伊用儉，閣也毋愛共人奢物，毋應得的錢，定著毋承受。伊無做生理，抑是啥物副業，因為咱人無雙重才，伊愛親像使徒專務祈禱傳道。
娶五个媳婦，嫁五个某囝。人講，有人嫁查某囝，無人賣查某囝；伊是簡素化毋是欲趁錢，也毋是欲嫁名聲，彼咧無用。大啊！傳教者，伊無踦舞台，伊佇草屯蹛 25年，家長，校長騎腳踏車相tng7頭，著落車共伊行禮，地方的紳士常常來拜候伊，學校常常請伊去訓示。會內，會外好名聲，25年換位的時，送兩萬五千箍 共伊感謝。
猶一句毋通未記得，就是佇員林教會的時，婦人人身軀咧艱苦，拄好梅牧師去員林欲出去佈道，梅牧師共郭先生講，佈道拍算你無閒，因為先生娘破病，你愛顧先生娘，郭先生講伊小可較好啦，你佇英國遐遠來共阮遮欲報傳福音，我那有啥物通阻擋我。古早禹王治水三擺過門口也無入厝內，因為看國比家較要緊。郭先生 看救靈魂比家庭較要緊。
郭牧師伊傳教52年，始終一貫，中間無歇睏，教會一年有一禮拜予傳教者休假，郭牧師52年毋捌歇半禮拜。伊離開草屯就是退休，雖然退休來蹛霧峰佮大囝郭 東榮牧師做伙，毋是傳道歇睏。論教會的工毋做就無講，欲做三个就猶有工通做，伊的身體猶真勇，對練行山路，人著牽我的囝，我毋免人牽。郭牧師 實在有爭戰好的爭戰，有守所信的道，成做好閣盡忠的無見笑的人。
伊的葬式佇大囝的教會柳原，真盛況。伊的冊名國原，有弔詩：
國原八十老將軍。傳教安貧好學文。義戰忠程守善道。神頒樂土賞吾君。
（實在79，別世時要添一歲）。
www.tcll.ntnu.edu.tw/pojbh/script/artical-13482.htm
