葉金木寫   《台灣教會公報》601卷，1935年4月

簡阿川是雞籠（基隆）教會e5執事，伊ti7主後1920年，對吳廷芳聽「破迷牢」e5道理，對hit tiap8就決心來信主，了後真熱心研究道理、白話字e5聖經讀到真熟。1922年，有受洗禮，對教會真熱心，禮拜真致意，入拜堂真虔誠，就是恬靜祈禱、讀聖經。伊一生是勤儉e5人，總是真甘願獻金ti7教會。

1926年，教會有揀伊做執事，對教會逐項e5事務，真有盡責任。1931年，有koh重任執事，ti7 3年前，拜堂e5宿舍有拆大路koh改築，伊專心來監督到完成，實在真感心。無扑算，ti7舊年中，有kap教會暫時相離，去研究天主教，到今年中會前，就koh得著上帝默示，反悔，續chhoa7家內來歸主。可惜伊久久ti7病院，伊e5病那重，ti7 2月初，就退院轉來。對hit tiap8到伊離開世間，阮有常常去探伊，kap伊祈禱，伊也kap阮祈禱。

到（1935年）2月13日，hit早起11點，安然受主揀召，進入天城，hit tiap8伊e5大細全部，kap我e5婦人人，kap我e5子也ti7伊身邊來送伊善終。我因為去赴中會，無ti7 leh。伊e5子（簡杖梨，後任長老）有用¥200.00獻做教會e5基本財產，有提¥100.00 來備辦喪事會用e5物，就是棺罩kap旗仔以及別項。2月19號頂晡，有ti7本堂舉行告別式，有真濟位e5牧師、傳道師來赴，也有附近e5教會真濟來赴；有請張牧師、徐牧師祈禱；陳清義牧師、偕（偕叡廉）先生說教；本堂牧師講履歷； koh有弔詞弔電真濟，式後寫真。這日有500外人會葬，市民攏choah起來。

我寫淡薄thang hou7大家來數念伊，1面thang傷心，因為教會失落1位主e5忠僕；1面thang歡喜，因為伊越倒轉，chhoa7家內歸主，安然到父e5厝，享受久長e5福氣。請列位替伊e5遺族祈禱。