冬烏源撰 《台灣教會公報》903號 1963年2月 p.10 白話字改為漢羅台語。

按：蔡榮華長老（1874-1962） 是蔡仁理牧師的祖父：請參見蔡榮華長老略記。

「謹慎守道理的教示的確有福氣，倚靠耶和華的閣較有福氣」(箴言16: 20)。

蔡榮華長老出世佇民國前38年，同治13年（甲戍年）2月23日，舊年尾過身，90歲，(出生地桃園縣，中壢近魚潭的所在)。佇民國前8年，31歲佇西潭得著福音，得著張槌傳道的培養，當時亦做本地方的保正，好膽干證道理，招人信耶穌捌道理。民國13年(1924年)，佇台中教會對高金聲牧師領洗禮。

佇民國15年(1926年)，就遷徙去台東縣池上鄉新開園開始建設教會(講義所)，敝人也受囑託佇這個教會，阮兩人真chiap8 做伙談論伊所經過的事，予敝人真受感激。來後山的由來，就是伊佇台中有開業一間的大旅社，開業無偌久心真艱苦，講基督徒做這款虛華的事業毋應該，日所思，也所慕，攏袂睏得，就講：欲俗 俗褪予人。俗語講：賣瓷的跋倒，看破，果然俗俗褪予人去lah！ 才將這條錢帶過來後山，一面買土地，一面建設教會，拄拄合佇箴言16:20的所講：倚靠耶和華的閣較有福氣。彼時土地真便宜，一甲地，田好的才差不多 300箍，較次的是一百外箍na7-tiaN7。 佇無久山前的人直直過來，土地起大價，上帝賞賜伊趁大錢，伊真甘心奉獻，上帝講：若甘心奉獻，我欲對天開窗仔拚落來予恁。有影，上帝所講的話無食言，伊佮敝人siang7時受接納做長老，佇新開園的教會。新開園教會20年前遷徙來佇池上，in一家大發展，教會亦發展；佇教會上出氣力的是in一家，出人物的也是in一家，有牧師，有長老，有執事，有議員，也有大學士，工場4，5間，事實真光榮。 佇欲出葬的時，有花蓮的袁牧師佮富里的張牧師負責舉行告別式。 棺木停佇禮堂內，莊嚴肅穆，致到予2000人以上會眾佮觀眾大受感激佮稱讚講：是本地方自古及今未曾有的。

故蔡長老有媠的信仰，幾若點通予咱學，予咱欽仰。

1. 就是：堪稱敦篤真可尊，暝日讀經真慇勤。

2. 就是：好吟聖詩244首，救主疼我不非。

3. 就是： 愛吟，我na2出外人客，天是我兜；世間毋是祖家，天是我兜；世面危險憂悶，天是我兜。

諒必伊敢是知影歸天的時欲到位，就對敝人講一句，我teh欲日下西山，看不見了，我就答講：我也是水流江海，永無回也。

真恭喜，伊的臨終真快活，無病，無艱苦，暝時睏，無人知伊予主chhoa7轉去，到大晚才知。彼个原因，就是伊有一款熱心的習慣，早早就起來讀聖經； 吟伊所愛吟的詩，猶早就輕聲細說，叫遐的孫媳婦起來準備早餐，怎樣遐爾晚lah，無聽著伊的聲，做囝兒孫的人真疑問，就去睏床探伊，倒直直，就連叫幾若聲，thai2攏無teh應，就掀伊所蓋的棉被，無喘氣，才知是已經予主chhoa7轉去lah！ 袂免得予敝人追念taN失落一位的老同志，兩方無相辭，就離別做伊去，一般的人呵咾伊，無論教會，社會無人嫌，敝人略寫幾句做追念。願主安慰遺族無傷悲， 通學模樣親像伊。永活佇天堂萬萬年，主也予咱安然過一年。

T. O. G. 字東方宿 擦目屎寫。

(筆者早前捌做本社的同工，現時倚欲80歲，猶勇健teh gâu做主的工)。