歐萬得牧師小傳

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

楊士養撰 「歐萬得牧師的小傳」《台灣教會公報》860號 1960 年8月p.19-20,從原文(白話字)譯出如下。

楊士養編《台灣信仰名人略傳》第2集 1969年 及楊士養編.林信堅修訂《信仰偉人列傳》1989年( p.231-236) 的「歐萬得牧師」(中文) 較詳細,可參閱。


歐萬得牧師,別名歐陽壽其,西曆1881年出世佇左鎮鄉中正村。14歲入左鎮教會的小學中學也讀4年;畢業後入台南神學校。讀到3年的時受派佇永康教會實習教小學兼傳道一年久。西曆1904年畢業神學校。後來受派佇下面遮的教會:-關仔嶺兼岩前(Giâm-chêng3年),民雄(3年),大肚(4年),白河(4年),花蓮港的公埔(富里)佮玉里(3年),草墩(草屯,半年),斗六(4年半),第2擺閣佇民雄(7年),過溝 (在嘉義太保鄉,20年)。1953年正月受嘉中議長黃東識設立做教師;1953年12月初10受過溝教會聘請做牧師,繼續牧會3年久。後來因為常常(tauh8-tauh8) 破病,身軀較荏,就對教會辭職。

1956年8月,伊的令婿連萬誥先生夫婦搬請伊到民雄佮in 蹛,奉待伊到路尾。歐做傳道計共47年,做牧師3年。按呢總算佇教會服務50年久。1960年6月25日別世,6月27佇民雄教會舉行告別禮拜。遵照故人的交代,請伊的學生楊士養來講道;儀式簡單隆重。對白河,嘉義,斗六,過溝,新港佮民雄教會濟濟人參加葬式。

論歐牧師的做人有幾若項通做咱的模樣。

  1. 忠誠盡職。佇教會做工50年,所蹛的所在會內會外濟濟人呵咾,真數念伊。以前濟濟教會有設小學;傳道師6日間教囝仔兼牧會。到禮拜日就講道理。歐先生 gau5教示學生,也gau5替人設法上進升學。鄭溪泮,李識情 2位故人佮陳明清,楊士養攏捌做伊的學生。因為歐牧師真久佇教會做工,南部大會有送伊銀盾一個,金十字架一支,嘉義中會送椅桌一副。遮的贈品歐牧師不止歡喜。

  2. 性情溫柔。佇家教囝以及牧會,待人接物非常溫柔。從來毋捌看伊發性起懊惱,宛然聖者的氣慨。

  3. 致意靈修。平素致意讀聖經佮祈禱:頂晡讀舊約2章,暗時讀新約2章。退休了後,有一擺到伊的學生的家蹛一禮拜;透早就起來讀經,祈禱,未睏以前也是閣讀。 祈禱無厭-佇伊的簿仔有寫:拜一替陳降祥佮施謙信祈禱(因為受in交託)。拜三為祈禱會。拜4為國家。拜5為伊的家庭。拜 6 替有緣故的教會祈禱。

  4. 準備便便。伊有3個後生,3個查某囝。大公子歐奉璋先生是齒科醫,捌佇上海,佇台北開業,大細(1955年)攏蹛佇美國。第二囝(奉元)2,3年前過身,留伊的 新婦佮兩个孫。第3後生奉三君,佇嘉義開齒科。大查某囝遂桃,嫁新港東張Ki-ló先生。第二查某囝遂吾,嫁連萬誥先生,佇民雄開綠星照相館。遂吾 35歲別世,萬靠先生後娶的婦人人真可取。四年前去過溝搬請歐牧師破病中gau5照顧,gâu款待。所以歐牧師對in兩人真滿足,共這个囝婿講, 「你名叫萬誥(ban7-kho3),我萬項攏靠你。」

歐牧師備辦幾若本細本簿仔寫伊的履歷佮伊的生活。也有威嚴佮勸勉,逐項整理真好勢;佮上帝也真清楚。看伊最後所寫的聖經節,就通知伊的心情。希9: 27 「人有一擺死,死後有審判。」詩篇116:15 「耶和華看伊聖的百姓的死做真寶貝。」啟13:14 「Taⁿ了後佇主來死的人有福氣。」按呢我想,歐牧師相信伊死後欲好膽安心受審判。因為逐項攏便便,閣相信上帝看伊做寶貝。願咱大家學伊的模樣。

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述