關係汪培英牧師的事，已經有出佇《台灣教會公報》9月15號，第918號。有得著汪牧師的第4令郎乃文先生提供伊的令尊的傳記真齊備，叫伊的姪仔刁工提來梧鳳欲交我的手，拄我無著，揣到台中，問幾若位，幾若choā，才拄著，交予我，我叫伊用雙掛號寄予我，伊毋敢寄，到看內容才知，莫怪乃文先生遐寶貝 這本序大人的傳記，是伊親身用偌濟的苦心，去南北二路佮對日本所調查，閣是伊親手所寫的，拍算敢無副本，所以若萬一紛失，oh得閣得著。我看猶有幾項通予咱數念的好模樣。

1. 真好的序大人，會堪得予序細數念；這本傳記，對幾若項來成。

   1. 將老爸所教訓，所指導的，一一記做家訓。

   2. 將老爸的日記，簿記，重要的書類，佮各機關有關的記錄來抄錄。

   3. 老爸所蹛的教會，長執，會友所有講，所有關係的記錄，有實地去訪問。

   4. 老爸的親友也一一去訪問。親像台南黃憲章(登發)先生，是同期又同年，所以真知伊的來歷。

   5. 葬式的訃音，順序，說教，會葬者姓名，弔電，弔辭，文句，所講的話，弔軸，弔慰金額，攏抄錄。

親像這款的傳記，每年的追悼會通讀予序細，親友數念。做囝兒的應該愛做一本來數念。

2. 汪牧師的有孝：高篤行牧師蹛萬丹教會，有一日去瓦磘仔佈道，講煞有一个老阿婆來講：道理真好，少年我嘛有聽，我的囝也teh傳道。高牧師講：你的囝 teh傳道。號做甚物名？伊講汪培英。共伊斟酌看，有影都著，那看那成，鼻仔啄啄，喙，目睭蓋親像汪培英，人講囝袂偷生得，無親像全，也著親像半。有一日高篤行予嘉義請去佈道；到汪培英的所在，就共汪牧師講：我報你好消息，我去瓦磘仔佈道，有一个老阿婆講是你的老母。汪牧師聽一見真歡喜，問有勇勇抑無？伊的穿插，伊的態度有活動抑無？隨時就提淡薄錢寄高牧師替伊提予伊的母親，通買淡薄物來補養身體，紲共講：我有勇勇，也得著上帝賞賜囡仔十數个，我遮爾遠袂得去共看。汪牧師的老母，是佇伊10 歲的時，死老爸，11歲的時出門，放伊頂無兄，下無弟，也無嬸，姆通倚大，佳哉一个老媽牽成伊，王牧師無怨恨放伊做孤雞仔，是念著有10月日的懷胎，3年久育飼食奶的恩，所以寄遮的錢表明感謝的心。

3. 尊敬老人：禮拜日有老人來禮拜，有較老的，較無勇健的，較遠路的，常常留in隔暝，一擺按呢，兩擺按呢，常常按呢，伊遮的囝兒心內想，咱毋是好額人， 米也無偌濟，定定teh留人客，咱家己紲無通食，無通配，所以對老人較無好禮。王牧師看出囝兒不敬的態度，就叫in來邊仔共in講：恁老爸10歲老爸死，11歲老母離開，頂無兄，下無弟，無叔伯，也無嬸，姆通倚大，佳哉有老媽通教訓，牽成讀冊，若是到17歲的時老媽也死，到我23歲才畢業，會趁錢， 想欲有孝都無爸母，無公，媽通有孝，所以我今仔日看著老阿伯是親像老爸，老阿姆是親像老母，親像老媽的款；恁今仔日有老爸有老母通疼，替恁備辦食，穿，有通讀冊，有爸兄去學校揣先生，恁畢業式有爸母出席，恁運動會，有爸母共恁看，共恁顧物，恁爸爸這福氣攏無，所以看遮的老人親像序大人。遮的囝逐个都巧巧，一下聽就攏會曉，隨个對老人毋若佇厝裡，佇拜堂，佇路裡看著攏真好禮。
   
   今仔日汪牧師有五个後生佮一个查某囝佇日本，兩个後生，三个查某囝佇台灣；佇日本的愛老母蹛日本通有孝，蹛台灣的愛老母蹛台灣通服事，定定teh相爭，因為老母的戶籍佇日本，所以台灣的爭較輸。有序細毋愛序大人的請聽。

4. 夫婦一體：吳臥龍 (大妻舅)做米商，做了teh轉袂好勢，將汪培英的土地共處分，處分了，第5妻舅吳媽西teh 共伊講，姊夫你的土地共你提去處分；汪牧師應講，無要緊，我的物就是恁的，吳臥龍若浮，我就綴伊浮，吳臥龍若沉，我嘛綴伊沉。這號話毋是講好聽的，其實心內是真毋甘，抑是講毋甘嘛著做甘，因為都處分了lah。汪牧師是誠心誠意teh講的。佇新的典禮，結婚的誓約文有加添一句「閣尊重伊的(婦人人)家族做你本身的家族，」古早無這句，若是汪牧師已經teh實行。有同娰仔teh抾私奇， 兄弟仔teh抾私奇；爸仔囝也teh抾私奇，連汪某也teh抾私奇；實在真見笑。紲講：「日頭赤炎炎，隨人顧性命。」閣講：「火燒跤，隨人家己掰。」閣講：「親生囝毋值著縖包囝，」這攏是私心利己主義的惡習。主耶穌講：「因為人的活命，不在佇伊所積聚的豐盛」(路12：15)。

5. 一概是欲救人：汪牧師多才多藝，伊的漢文真精通，伊是博古通今，無所不學的；gau5讀冊，gau5運動，會種蘭，會種菊，會跑馬，會釣魚，gau5食茶， 也會西洋料理，也會東洋料理，文棋會，武棋也會。所以伊對逐階級的人攏講有話，會得交陪，交陪的目的，毋是為名利，一概是欲傳福音救人。親像保羅講：「我向逐號人，我成做逐號款，一概是欲救人」(I 林 9：22)。所以對漢學者佮伊談論漢學，種花的人佮伊講花種栽培法，食茶飼蜂，圍魚跑馬，伊攏會佮in投機，對青年就用英語。俗語講：「無入虎穴thai3 會得著虎囝。」汪牧師有用伊的多才多藝來深入各階層，是欲得著人那濟。有人坐佇厝內面，親像「守株待兔」 teh聽候人家己來。主講：恁著去招萬百姓來做學生。

6. 知足常樂：伊雖然細漢無爸，也無母，猶過感謝上帝賞賜一个阿媽通監督伊讀冊，雖然有寡田，為妻舅的生理會得通轉敗為勝，賞賜伊身體勇健，囡仔讀冊攏順序，攏讀官立的，不但省錢閣有獎學金，事事感謝，事事快樂。伊本身按呢，伊的教訓也按呢。有一擺看伊的同門的劉菜頭先生，伊雖然是好額人，若是逐日teh操煩bai2，連鞭生理比舊年較bai2，逐位厝稅無收，利息teh降低，teh掛慮。汪牧師用真濟實例，佮伊本身的體驗共伊講，著知足常樂，講了劉先生那親像teh睏予伊叫醒，對按呢劉先生驚了袂記得，就叫gau5寫字的人寫大字做匾，掛佇應接室的冊櫉頂，舉頭就看見。知足常樂。是lah！上帝共咱拍算是妥當閣真實，自然著知足，知足自然會常常快樂，雖然受拍關監也會歡喜，破病了錢也會快樂。

7. 有真濟特效的袐方，較濟是青草。伊的人逐項都斟酌，無譀譀；青草，有項一號草幾若个名，各地方無siāng，有所在號做蝶仔草，別位叫做一支香，也有一個名有兩款草，所以汪牧師伊teh報人，著講到真詳細，著用樣本報人看，用法也講真詳細。咱人常常講：「藥仔濟人捌，食袂行；」這是甕肚，因為驚人學去，伊就無通趁錢。汪牧師毋是欲趁錢，是欲救人的，所以愛人捌，真愛教人；伊的袐方按怎會遐濟，較濟是佮人交換的，比並彼人有袐方，攏毋予人捌，伊有代誌欲央伊，伊就附條件講：你彼項藥仔共我講：我才欲，若無我也毋共你醫，彼陣伊才甘願講。汪牧師講：咱毋若著救人的靈魂，也著救人的身體，因為健康的靈 魂是蹛佇健康的身體，所以愛健康的靈魂，著愛有健康的身體。牧師阿，你關心救人的靈魂是無錯，但是伊的身體厚病痛閣sòng-hiong，你敢毋著替伊鬥想路，你有這號免錢藥，小可藥會醫大眾。汪牧師佇10外年前有出佇公報，teh介紹青草藥。親像腿頭膿，只有用熟薰，石花(洗一遍水hiat捔)，蒜頭，沒藥鎚來糊，設使會真疼抑是會吐，才共剺起--來，糊了後來會吊規粒，抑是自按呢散去，真好用，我常常用。蛇藥也真懸。

8. 好的先生：論伊的教冊。

   1. 19歲佇岡仔林教小學一年。

   2. 神學校畢業了，23，24歲佇神學院做助教兩年，是佇亭仔腳街分教室，也名另大學。伊也捌教戴醫生的台灣話佮曹牧師（曹恩賜，Rev.D.P.Jones）的台灣話，(曹牧師無佇台灣做著 工就閣倒去讀冊)。伊毋若有學問，是gau5教，閣gau5疼學生，對學生留真深的好感。離開岡仔林幾年後，閣去thit迌，學生攏來，見著那天裡跋落月，非常的歡喜，暝日攏綴牢牢，話講袂了，相爭欲請，預定的日到，欲倒來，有的請無，teh流目屎，路尾閣留一日。看著in的相疼，予咱想學生teh疼耶穌，是因為耶穌代先有疼學生。有先生無疼學生，抑是大細心，冤枉學生，別日學生進步成功的時，著毋著，伊攏知，對先生攏無尊敬。汪牧師毋若對學生，對會內，對會外，見若佮伊有接觸著的，不論囡仔，老人，富貴，貧賤，gau5，頇慢，攏數念伊的品德道行，偉大的宗教家，無見笑上帝的忠僕。
      有一首詩，將培英牧師為卷首，以欽仰其靈程高及品德深。「培養身靈賴聖神。英明視聽識真人。牧羊盡職行天道。師範堪誇耀主仁。」

9. 極歡喜的款：汪牧師真gau5講詼諧講：伊捌看一人讀伊的文章，當伊讀入神的時，in內面人捧一碗麻糬佮一phiat仔土豆麩糖來予伊食，伊一手提冊，目睭teh看，喙teh念；一手舉佇，對麻糬就挖一糊，土豆麩糖毋滒，對烏墨盤直滒，就食，食到一喙烏ma3-ma3，因為心不在焉，食而不知其味，有甜無甜 攏無感覺，人才講你的喙thai2會烏到按呢，伊才知。凡事有心佮無心的增差真明，注神佇文章，無關心佇食，搵著烏墨來食也無感覺。這類的詼諧是汪牧師得意的話柄。

10. 選擇大媳婦：有一個好朋友問汪牧師講：「你平常對日本人無好感，按怎thai2會娶日本女子做媳婦，應講這也是上帝所配合的；因為大囝修文愛蹛日本，已經30歲lah，當時台灣女子佇日本較少，這个媳婦是熱心的基督聖徒，我有用三个條件予伊應答：

    1. 阮是台灣人，佮恁無siang7民族，無合。

    2. 阮是宗教家，是song3-hiong人，所以你嫁修文驚了會食苦。

    3. 修文是大囝，所以將來有家長關係，著愛倒來台灣。

這个女子有回答：

1. 對上帝無分宗族，無別邦國，天下一家。

2. 咱毋是重富輕貧，是看信仰佮人格，修文是堂堂一个醫師，thai3著驚song3-hiong。

3. 應該著倒來的時，我當然歡喜同甜同苦來盡婦道。 汪牧師看所應的有滿點，所以就准in進行。