1935年墩仔腳賑災記

 

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

汪宗埕報 原題「賑災記」 《台灣教會公報》603卷1935年6月 p.28-30 ; 604卷 1935年7月 p.28-29 [由白話字改為漢羅台文;按語及( )的註是LES所加]

按:1935年4月21日晨6時2分,大安溪中游流域(北緯23.350度,東經120.817度)發生芮氏地震規模(ML)7.1的強烈災害地震;墩仔腳就在震帶的中央,故名「墩仔腳大地震」。墩仔腳又作屯仔腳(今屬台中縣后里鄉)。汪宗埕(1892-1985)牧墩仔腳教會的期間是1925年4月1日至1936年3月31日,而於4月15日就任淡水教會牧師。


佇(1935年)主耶穌的復活節,4月21號午前6點2分,墩仔腳地方有拄著未捌有的大地動(地震)。對起頭就真動,約兩秒的中間,規(全)庄的厝全部倒壞,墩仔腳拄拄是佇震帶的中央;人受搖倒,土腳爆裂,有所在沈落約5尺深,墩仔腳一鄉庄受壓(teh)死的千外人,拄著重輕傷的,袂算得,一間厝壓死7、8名的也有,實在悽慘到極。
咱教會這 pang也拄著損害真大,信者受壓死的8名,求道者受壓死的11名,自然會友的厝是攏倒到平地;佇遮有人保存in的生命,通講是神蹟,禮拜堂佮宿舍,對地基倒到平地,阮規(全)家族,攏受壓蓋佇內面,感謝上帝的愛顧,隨時予阮得著人來救援掘出, kan-ta我的第4查某囝(汪娟娟)12歲拄著壓死若定,其餘的拄著重輕傷,實在是盤過死線,九死一生的經驗。後來詳細檢查受壓的所在,就知是有呎外的空地通通空氣,若無,就全家氣絕佇內面。所有的物件,拜堂的備品攏壓佇內面,佳哉得著大甲教會蔡教師(蔡受恩)佮長執特別的同情,趕緊倩人來發掘;總是較濟已經壓歹啦,按呢禮拜堂佮宿舍,以佮備品的損害約有4000箍左右。
地動一下起,規庄的大厝、小屋攏倒到平地,一時喝救的聲,悲慘的聲,毋是耳孔所會忍得聽的,悽慘的狀態,毋是筆墨所會得通形容的,若毋是實地的經驗者,oh得深感彼个情形。俗語講:「扛棺材的貿哭。」這句話真正有應驗佇屯仔腳啦,規莊頭逐家攏有死傷者,倩無人通埋身屍;一時連棺材都無當買,kan-ta用薄的枋(板)來釘做路用;壓無死的人,著家己扛in家內的人,抑是親戚去埋葬,有人用貨物車載規車去塚山,一時塚山真鬧熱,無感覺淒凊。佇22號,貯受壓死信者的棺材,攏排佇禮拜堂前的榕樹腳,相時舉行告別式的禮拜。大甲的蔡教師佮豐原的楊傳道師(楊朝賞)來替阮主理,也有豐原、大甲的長執、會友,約50外名來會葬。
起頭2日2暝,阮無所在通歇身,是歇佇禮拜堂前的榕樹腳;後來戴醫生(戴仁壽、Dr. George. Gushue-Taylor) 有來替阮設法起枋厝予阮蹛 ,伊也佮阮歇佇榕樹腳過一暝。照戴醫生講,看見新聞所寫,較無感覺彼个悽慘;到本身來遮看,來遮過暗,透早起來的時,聽見規庄啼哭的聲,實在予人難得當的慘境。
這 pang咱政府的施設,通講到極周至,震災彼早起,就派治療救護班、青年團、壯丁團、警察隊、軍隊,來發掘受壓,抑是受壓死的人,分配食物佮水,暗時軍隊、警察隊分配來巡視,一時親像佈嚴戒命的款式,赤十字社有出�����來治療,也有建設臨時病舍,收容重傷的人,各方面的慰問團,每日幾若千人。天皇��下有派欽差來慰問,規庄民感覺皇恩的大。
這pang戴(仁壽)醫生毋但設法阮的假宿舍,也有另外起(蓋)8間的小厝,欲予散鄉人蹛 。阮這pang有得著大甲教會的蔡(受恩)教師以及長執,替阮設法拜堂各項的事,也得著怹的慰問送金品。聽見蔡教師講:「偉彼得牧師(Rev.J.D.Wilkie)有提100箍予伊,教伊替阮設法臨時禮拜堂的事,另外有受著南北宣教師團、南部大會、嘉義中會的傳教師會、北部中會傳道局、長執會聯盟會、北部傳教師會、台南基督教青年會、台南神學校、台北神學校、台灣基督教青年會、台灣日本基督教會中會、台中聖公會、東勢教會、貓盂(苑裡)教會、鹿港教會、溪湖教會、松山教會等的代表者,來慰問佮送金品;以外猶有各地的教會、團體,抑是個人的慰問佮送物,抑是慰問的批。對以上遮的同情者,抑是阮所毋知,隱密中的同情者,阮屯仔腳教會,佮得著盤過死線的家族,愛表出恭敬說謝的情,阮踮佇厝,來享受這个恩顧,也踮佇主來感謝列位,紲求列位接紲的愛顧佮替祈禱,予阮有復興到完成的日子。
-----------------------------------------------------------------------------------------------------
前4月21號的震災,算是罕得有的大強震,信者中濟濟人teh拍算敢是末日--啦,有人佇田裡teh做工,看見土地是膨懸起來,才閣沈--落-去;我是感覺親像teh沈--落-去的款式,一時有烏暗佮hú-hú吼的大聲,真是怪現象。
這款的強震,愈堅固的厝宅,通講彼个破壞是愈厲害,我拄著這款的經驗,深刻感覺人無通誇口伊的厝宅堅固,佇世間是絕對無有安穩佮堅固的所在,完全是倚靠上帝才有平安的生存(行17:28)。
上帝的受氣kan-ta才2秒久若定,人尚且擔當袂牢,何況將來永遠的審判,人thái-thó會堪得擔當啊!所以人佇上帝的面前,絕對是無通驕傲的所在,濟濟人受這擺的刺激,有顯出信仰的心,阮遮有幾若人,濟濟年的中間無愛來做禮拜,今有閣發出信仰,熱心來teh禮拜。
這擺為著震災的悽慘,實在是非常,若有財產的人較無特別的感痛,若是中產者的人,今是變做破產者;亦若是無產者,今是親像乞丐的款式。看見這個情景,實在會予人感慨傷心無盡,來發出同情佮惻隱的心,若無,是一種變態的人類--啦。
佇 5月22號,踮拜堂的假宿舍,有開催追悼會,得著北部基督教協力奉事團、大甲教會、豐原教會、劉(忠堅)牧師、戴(仁壽)醫生、葉(金木)牧師、張(金波)牧師等做後援,有請劉牧師司式, 舉行嚴肅的追悼禮拜,式場有排列遐的死亡者的遺像,也有花環,花十字架,佮逐位寄來弔聯、弔詩,彼日雖然有落大雨,總是式場也是滿座,有人煞攑 雨傘徛佇式場外teh參會,今著共列位後援者佮參會者說多謝。
同彼个下晡,戴(仁壽)醫生所起彼8間的BARAKU(小厝)也有紲舉行落成式,來分配予八家的人徛起,也有買物件來分予怹i ,逐家大歡喜感謝上帝,佮戴醫生的好意。閣彼下昏,奉事團有開催慰安會,來奮發信者疲敗的精神,有吟詩,講故事,蓄音器,照幻燈,到十點外才閉會,受感激--的袂少。
震災後,來做禮拜的人數,比較以前有較盛況,前是50~60外(多)人teh聚集,今排列震災後的順序:20,54,64,51,96,102,83,不止有較盛況。
遮的受災難的信者,大感激恁列位同情者的美德佮博愛,佇欠缺中得著恁的同情,彼个感覺最第一深刻;親像古早人有講:「渴時一滴如甘露,醉後添杯不如無。」遮的話,是金言格言--啦。
今 恭敬對列位替敝地會友共恁說感謝,紲記獻慰問品者的芳名,來做領收:北部傳道師會,台中市基督教聯盟,男子日曜學校,佳里教會,加拿大母會(有派柯先生娘來),豐原基督教青年會,彰化教會,台北市日本基督教會,北海道名寄組佮教會,日本夏姑娘,東京金姑娘,彰化安姑娘,日本台灣基督教青年會,以上有接著怹的慰問品佮慰問金。
也有閣收著戴(仁壽)醫生寄來3大件的慰問品(蚊罩、衣服、面巾,以外真濟項)。
政府順這個機會,欲紲施設市區的改正,欲開5條橫直的大交通路,咱拜堂的墟地,著3份1份受拆做大路;拜堂位煞變做市街的中央,不止有攪擾佇teh ,土地也較無夠用,若有拄好的所在,咱拜堂愛欲閣換位較好。
向望看報的兄姊,佇祈禱中,請著替阮祈禱,向望上帝施恩典,無久中有新的拜堂佮復興教會,是心所願。  

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述