三年運動特記 1937年12月

 

三年運動特記 1937年12月

明有德(Rev. Hugh MacMillan) 報 《台灣教會公報》 633號 1937 年12月 p.30-31《北部中會》143號 原文是白話字。


I. 指導的事。
看路加9:57─62,有3款人真愛綴耶穌;總是逐个攏有阻擋。捌伊所欲行的路無夠額,抑是創家己的事真無閒,抑是家己的厝的人的阻擋。照看耶穌無愛將怹所掠做阻擋的事來做阻擋。這款的阻擋,耶穌本身攏知影。伊本身拄著比這款閣較大的阻擋;總是主彼時已經咧行大振興的路。
予咱常常艱苦的一項,就是咱的主遐爾有精神咧進上帝的旨意的路,總是咱綴伊無夠額。伊遐有精神,咱遐無,毋知欲怎樣說明。拍算彼三人的阻擋咱猶原有。咱逐位教會的信者,若有通得著主的精神雖然淡薄,的確濟濟指導者會出來。我愛排列幾若項予咱想,本教會內有偌濟指導者。
  1. 佇祈禱會,抑是聖經會有偌濟兄弟會主理,讀聖經,祈禱? 咱著獎勵逐个信者攏會按呢做。怹若按呢做,怹較會進步佇捌道理;較會指導別人,猶原親像怹來捌道理。
  2. 佇婦人會有偌濟姊妹會主理,讀聖經,祈禱? 婦人會有四份一會按呢做未? 咱著獎勵逐个會按呢做。按呢做才會幫贊人捌主的精神。
  3. 佇家庭禮拜有偌濟會主理?
  4. 佇青年會有偌濟會主理? 抑是會出甚物來幫贊? 咱著獎勵予逐个有份佇彼个聖的工,才會出指導者。
  5. 佇主日學有偌濟囡仔無驚惶,歡喜起來幫贊主日學的集會? 做囡仔的是較快進步,所以咱佇主日學著準備將來教會的主日學。主講,著綴我。伊的意思咱知是關係逐个信者,就是不論有學問,無學問;無論老,少年;無論男,抑是女咧講--的。
II. 通信聖經學校。
第一回已經到佇大家手。若是猶未有的人,請對教會的先生,抑是區委員提。愛講幾若項:
  1. 向望會較緊著手來研究。這久咧備辦第2回。
  2. 檢采有的感覺不止僫(oh)。有所在聖經無明明寫,較艱苦應。本部的意思毋是逐項拄拄照聖經所記來應。譬喻舊約第7條,關係摩西家庭的狀況,對聖經檢采較僫揣著拄拄彼款的材料。這是著詳細讀遐的記事,也對所讀-的來推理得著濟濟款的證據。總是毋是無看聖經用臆--的。詳細讀聖經,也詳細想來應。照理所讀的結果佮確信來寫,毋免掛慮毋知會合部會的意思抑未。十个人所寫檢采無攏相同,逐个有伊的特色,有的較通,有的較無。本部的方針是活-的,毋是死訣的。
  3. 第一回期限是照所印的紙注意事項第8條,到新年正月尾。
  4. 向望逐个攏參加。有的真細膩講,我毋捌,袂曉。總是有先生通問,也有聖經通讀,也有朋友通鬥幫贊。盡所會來做就夠額,表明總動員的氣慨,大家來相佮進步;毋免有的咧進,有的無進;按呢教會無力,也袂整齊。
III. 三運叢書第1卷「三年運動的要旨佮實際。」現在咧印。這本,咧想看有什麼路予信徒逐个攏總有。
  1. 這本的目的是為著愛實現總動員,統一全信徒的精神。因為無按呢就是袂運動。
  2. 這本猶原佮第2卷平大本,所寫--的是照咱現時所無夠的補予伊平而已。信仰佮在來所用的方法較無力的大概閣想過。也信徒生活也是向望會較四正,較活。
  3. 內容是分做兩部分,一步是要旨,一步是實際。