三年運動特記 1937年2月

蕭樂善 (署 S. L. S. ) 報 《台灣教會公報》 623 號 1937 年2月 p.25-26 《芥菜子—北部事務》 133號 原文是白話字。

1. 主張

本運動的工程真闊，佇各方面攏有工著做。咱的標語是講，「求主奮興你的教會，代先奮興我」。咱怎樣叫做得著奮興？毋是干焦用喙念，也將這个工一任上帝，也家己照舊。來禮拜照在來的款，祈禱是照舊，實行福音也是親像早時。講話也照舊，獻金也照舊。按呢無奮興，逐人著家己看做無力，無智識，也屈低佇上帝的面前，靜靜聽伊的聲，也佮上帝立約欲照按呢去實行。咱佇說教聽上帝的話，抑是家己teh讀聖經，用甚物精神teh讀；總是咱心內若無真大的要求，也大大敬畏上帝來讀，是無甚物功效。濟濟人講聖經是寶貝，這是著；總是若看聖經做金銀，寶石，無活命的物，干焦做人的裝thāⁿ的路用，按呢上帝的話無價值。上帝的話，毋是無活命的，人干焦愛讀聖經做家己講話的裝thāⁿ，予所講較好聽，較予人共咱看做好人，抑是裝thāⁿ咱的所行，予咱的所行較袂遐歹看，較會予人呵咾；若是心內是舊-的，所想是舊--的，性格是照舊，私慾照舊，倚靠家己，對重世間，按呢毋是真實讀聖經的人。「上帝的話，是活-的，是有功效的，比一切雙面的劍較利，凡若魂佮神，骨節佮骨髓，無毋刺入破開，心內遮的念頭佮主意，也無毋鑑察。」上帝的話，毋是愛變換咱的外皮，是愛變換咱的所想，咱的性格，咱的所向，按呢才有上帝的奮興。讀聖經自然是要緊，總是著有一生的拍算來讀。那讀那備辦咱的精神，到咱有真四正的精神來讀，彼个力真大。

2. 工作

對(去年) 12月起，逐月15日，欲發刊 「三年運動時報，」因為感覺無夠額，也閬傷久，請有關心愛教會進展的兄弟，有甚物勉勵的話，請寄稿來，較簡單較歡迎。初10著到位。照時報所刊，年頭特別集會，是愛會友相佮受信仰的事來斟酌出發1937年起頭的跤步，照所計畫進行。也新年的計畫，這久準備中。對2月起 ，本運動的叢書會那發刊。