|
蕭樂善 報《台灣教會公報》 632號1937 年11月 p.26-28《北部中會》142號 原文是白話字。
1. 新出發的教會。
-
信仰的食料問題。近來關係人的身體的營養有真濟款的研究；因為到今猶未得著真合，真理想的食料。咱的信仰的食料是咱不時的問題；總是咱看做是路尾的問題，致到食物濟濟樣，所養飼的人五花十色。信仰的畸形，營養不良，無方針，無主旨的人濟濟。
-
耶穌講，「我是活命的餅，就近我--的決斷袂iau。」咱的食料佇主的內面以外無好的食料。伊的人格，伊的十字架的精神，伊的大量，廣大的心，伊對真理，正義的勇敢，伊的清氣的心，咱對遮的有什麼勞碌抑無？咱放拺咱第一理想的食料，也逐日咧食人情米，配假好的菜，食名聲，食地位，食金錢。這按怎會養飼信仰健全的人？ 這怎樣會予教會明亮，有榮光？ 咱用基督教的名咧傳教，咧做信者，咧做濟濟樣的工；總是咱佮主相佮徛起，攏無看見什麼工，什麼勞碌。
-
對這个時局咱感覺什麼？敢無予咱感覺信仰毋是干焦我信上帝就清楚。毋是一間，一部分，一教派的活動做滿足，是著予基督教有力。到今咱無要求合同的工。到今仔日咱袂做什麼，是當然。咱毋是拄著什麼問題才欲來奔走。敢毋是平時著掛慮，怎樣予基督教有力。今仔日咱著反悔的，是到今無相幫贊，無有協力佇福音的工；隨人顧家己，一人顧一角，無誠意，無忠實佇基督教。向望咱閣重出發。
-
著有組織tek的變革。咱教會的組織毋是干焦對外國提範來應用，是著合佇台灣的才會用得。干焦人情上逐个較凊彩，無咧想教會的損失偌大。對這款無意見的教會，孤不將著有一定的規矩來幫贊in較有路通解決in的問題；因為教會的組織是愛有次序，規矩是愛幫贊教會發展。所以若有什麼缺陷，有阻擋教會進展的，就是失落法規的目的。
-
治會著有責任。小會到中會各部局，若無責任的做事，干焦趁人情，無咧想教會的損益，是予教會那衰敗，的確無那興盛，所以這點咱著看做要緊。
-
著有較濟間的獨立教會。欲較快得著這，著用集中的方法。看對幾位特別計畫佇遐，附近的傳教師，長執，以及會友擒佇遐傳道，按幾年久獨立來做，才有向望。若親像在來的方法，檢采著閣60年久才會實現。干焦一个傳教師做工，欲予彼个教會獨立是非常僫的事。獨立教會若那加添，也會進到牽成一間，抑是兩間到獨立，按呢教會的進步就真緊。咱著有這款的心志，向彼款的目標來進行才有盡咱的義務。
2. 通信聖經學校。
這擺為著愛鼓舞予大家有聖經的地基，備辦一賓研究的題，予大家通想，通對聖經來研究，來應答。這已經備辦好不止久，干焦袂得通印。這擺頭一回的額已經印欲好。若印好，會隨時寄予各區到佇大家的手。
-
頭一回佮第2回，是新舊約大要的研究。舊約用摩西，以利亞做中心。新約是用耶穌基督做中心，來掠著in的精神。
-
所問--的，毋是人名，地名，抑是年ko。這款--的較快應，是愛予大家鍛鍊想，對聖經來揣，對經驗來應。是活--的，佮咱的信仰有關係--的。按呢才會幫贊咱的信仰生活。
-
答案毋免寫真濟；總是也毋通傷簡單。著有對題，也要緊的點，向望無落去。
-
部會愛採點，若有50點以上的人，愛將證書送伊，通做久長的記念，也第一回起，逐題若有得著所定的點以上的逐題，有媠媠的記號通貼佇證書。向望逐个出力到得著證書，予部會所備辦的證書無夠，著閣印。
-
家己靜靜看聖經來寫，抑是幾若人相佮研究，抑是佮教會先生相佮想攏通；不過逐人著用家己的話來發表，家己夯筆來寫。
-
北部以外的會友若愛參加，本部歡迎。
3. 秋天 大家較有元氣通活動咧幫贊教會，咧佈道的人，向望對「聖經要領」得著幫贊。若愛知詳細，請看7月號的公報第29面。
三運叢書(第一卷) 「三年運動要旨與實際」佮第三卷「教會之進步與受託之本份」。這久趕緊備辦，向望佇年內會得刊行。詳細後號會閣寫佇遮。
|
