三年運動特記 1937年3月

蕭樂善 (署 S. L. S. ) 報 《台灣教會公報》 623 號 1937 年3月 p.23-24 《芥菜子—北部事務》 134號 原文是白話字

1. 主張：

遐久的歷史的教會，應該著出濟濟人物，抑是信仰的勇者，抑是濟濟忠實的信徒；總是這是真稀罕。為著按呢教會軟弱；毋是人數少，錢少的無力。這是針對信仰的缺陷所致的結果。今仔日對這方面的進步是真要緊。

佇基督的信仰是愛向前的信仰，毋是驚死的信仰。耶穌向十字架咧向前彼款的精神著做咱的精神。伊來世間毋是驚死，愛走；若按呢，伊來是無目的。信徒起頭檢采為著家己的得救，抑是利益來信；總是毋是通不時為著按呢來生活，著進步到無驚甚物阻擋，抑是危險，佇福音做勇者，這才是實在信。

到今咱怎樣咧經營咱的信仰生活？怎樣咱的信仰幾十年久，猶原是軟弱，無甚物進步；怎樣未曉傳報福音。這是對咱的心肝傷細。咱若干焦向望愛得著指導，來禮拜，來祈禱會，來聖經會，咱無勸向望愛得著指導，來禮拜，來祈禱會，來聖經會，咱無勸向望愛指導別人。不管會，未，要緊咱著有這款的心志。閣較袂的人，伊也對所有的自袂有所得，通指導別人。咱若照咱所得著淡薄，抑是所經驗的即時指導別人，按呢就到額，伊的信仰欲那加添氣力。總是毋通自高，掠家己所捌的完全。

信徒對基督的指導是真要緊；總是基督猶原愛咱盡所會指導別人。這是因為愛咱有進步佇信仰。人若不時干焦向望人幫贊，向望人指導，彼个人不時是軟弱的人，是無志氣的人。上帝毋愛伊的囝(信徒)做彼款無志氣的囝，是愛咱做有勇氣，佮上帝相佮行。

今仔日教會不止欠缺平信徒的傳道者。就是信徒領受傳福音的責任，盡氣力來準備做傳福音的工。這款的人愈濟，教會欲進展就快。總是毋通傷凊彩。若傷凊彩，毋但未利益教會，有時害著教會。閣傳教者雖罔有領錢，也著存做平信徒的傳道者的心志來做工，著為著傳福音來領錢，毋通為著領錢才咧傳福音。

前咱想傳道局出錢，出先生的所費，也我出工來禮拜，今彼个時代已經過去啦。今仔日咱知教會的責成是咱逐个信徒的，咱愛家己計畫予教會徛在。毋但顧家己的教會，紲愛牽成一間，抑是兩間到獨立。今仔日咱的確著有這款的精神。顧家己是自滅的路。求上帝換新逐个信徒的精神。

2. 工作：

照三運時報所講，年頭特別集會。16─28，新竹佮大甲區，我佮鄭蒼國先生有出場。這兩位以外攏有真好的聚會。雖罔是禮拜日以外的聚會；猶過大家真整齊來赴，有的對幾若舖路來，夠額通感動人。目的是信仰來出發。這兩區了有，紲來桃園區 4，5位。宜蘭區是19─24，蕭安居先生出場。各教會大家不止協和，愛相佮出力追揣上帝，也振興上帝的國。台北區猶原有濟濟位有開。