傳道趙時回小傳 

傳道師趙挽（時回，東港人，1864-1909）.，妻吳偷（1873-1987），鹽埔仔最早信徒吳著的三女（參見《教會史話》150及178），享壽106歲（參見《教會史話》339）。[  趙吳偷百歲華誕紀念照  趙挽（時回）．吳偷裔譜]《台南教會報》第295卷，1909年10月 p.84-85，由白話字改為漢羅台文如下：  

趙時回e5小傳 劉俊臣  

趙時回先生，是阿猴（屏東）廳屬東港教會南平庄e5人。出世ti7 1864年；無兄弟有兩個小妹。細漢e5時老父就過身；佳哉伊e5三叔是熱心拜上帝e5人，引chhoa7伊來聽道理。續設法hou7伊來東港教會e5小學讀冊。先生雖然m7是資質真高，iau2 ku2是殷勤好學e5人。Ti7小學讀冊幾若年就不止進步，所讀e5冊真濟。tu2遇巴牧師（巴克禮，Rev. Thomas Barclay）去hia巡視聖會，看伊是殷勤可取e5 gin2仔會栽培tit，將來thang做較有路用e5人，就chhoa7來府城hou7伊做淡薄工，順機會教示伊bat道理較深。後來牧師那知伊e5好品行，（ti7 1885年11月）就舉薦伊入大學讀冊講究道理。在學e5時殷勤學習，尊趁學規，敬重先生， kap窗友和好hou7大家歡喜。 

Ti7 1887年iau2 ku2做學生e5時，一擺hou7教士會差伊kap我（劉俊臣）去澎湖e5竹篙灣嶼傳福音，向望會另外ti7 hia建設禮拜堂hou7會友家己聚集。因為hit所在是孤單e5海嶼，beh來馬公著過海，往來不止m7利便。無扑算hit所在e5人怨恨道理；從中有許全泰不止出頭，唆使庄民用石頭tim3咱所稅e5厝。因為an2 ni攪擾，然後致到先生受扑不止傷重。宣道會吞忍無kap in計較，iau2 ku2先生甘願受扑無哀怨慘慼e5不願。Che是顯明伊別日果然會堪tit當這號傳道e5職。 

Ti7 1892年卒業受派去tiam3加吶埔e5教會。Ti7 1893年娶鹽埔仔庄熱心e5長老，著伯（吳著）e5第3查某子（吳偷）。先生娘也bat ti7女學讀冊幾若年。所以kap先生同心歡喜做主傳道e5工，無論換去到甚mih所在e5教會，兩人和心盡本份。因為an2 ni濟濟所在e5教會tui3 in得著利益。先生無論到to2位e5教會真ai3設學教示gin2仔，所以凡伊所到e5所在濟濟少年人得著伊e5教示。若看有hit號熱心可取e5少年人就koh較致意鼓舞in著出頭來做傳道救人e5工。我知幾若人入大學受教示就是先生鼓舞e5氣力。 

koh先生本身雖是散hiong人，iau2 ku2真gau5克己款待人；有時有會友艱苦就照伊所會做e5氣力來周助伊。koh伊做人性情活動輕快；若知甚mih會友有tu2著煩惱艱苦e5事，常常致意到位去安慰伊。Tui3 an2 ni不論先生所到e5所在，大家ai3聽伊e5教示；雖然換去別位，iau2 ku2會友tauh8 tauh8數念伊。幾若年前有染著肺病，那久那傷重，有時也嘔紅（血）真濟，連連幾若日。Tui3 an2 ni四肢落肉。不論兄弟抑是朋友去看，大家替伊可憐，iau2 ku2 m7 bat聽伊有哀怨苦慼e5聲說。我幾若擺去探伊，m7 bat tui3我講伊e5病有甚mih艱苦。較常是議論伊定定倒ti7眠床，禮拜日be7會起來講道理，辜負教會e5交託，某會友冷心，某會友罕tit來禮拜，我攏be7會去勉勵in,實在真thang吐氣，心肝常常替in煩惱。足見先生真關心致意所著做e5工。 

幾若年前教士會看伊e5身體hiah lam2,就ka7伊換來東港e5教會，因為hit所在是海墘，打算tiam3 hia身體會漸漸較勇。M7 ku2因為伊e5身軀真lam2  koh ti7舊年7月間嘔紅幾若日，自phoe hit時就離開世間，總是天父憐憫hou7伊較好淡薄。Ti7今年（1909年）正月知伊定著be7好，就tui3教士會辭職。Ti7伊家己所在起厝，二月間就搬返去。到ti7新曆8月5號，（舊曆6月20）頂晡10點鐘就hou7主召伊返去；享受45歲，到21日出葬，會友成百人來送。 

今先生過身是脫離艱苦，享受天nih e5榮光。M7 ku2先生娘（吳偷）kap 3個後生（俊祥、俊卿、俊方），一個查某子（郇淑），大後生（俊祥）今年chiah有12歲，koh無甚mih親戚thang倚靠，實在oh tit過日，向望看報e5會友替in祈禱，hou7 in受安慰。koh ai3咱列位傳道e5同伴會學伊做教會e5工到一世人。