洪氏真較常叫做侯姆，是戴返牧師的令先母。主後1854年出世，到今年（1940年），tu2享壽86歲。46歲(1900年) 的時信主，共40年久經過信的生活。會來就近主的動機，是tui3佇tu2著病痛，感覺平時所崇拜的神佛，be7 thang hou7伊的心平安，就受苦勸決心尊趁道理入信仰敬拜上帝。伊真照本份服事上帝，上帝施恩賜福hou7伊，hou7伊子孫真興旺，子兒新婦，內外孫總算成百人。

論到伊的生平真可取，有濟濟美點。這tiap8記幾若項hou7咱做數念：

1. 信仰堅固：信主了，隨受人攻擊，phi-pok8，厭賤，譏刺，以及tu2著患難困苦，也是有進無退。

2. 致意家庭：真奇妙！！！子孫大多數kap伊同心敬拜上帝行天路。會an-ni，查考起來，無m7是tui3佇伊的信心kap信的好所行所感化來成的。

3. Gau5疼主：時常照所會奉事教會，關心佇主。特別thang顯出伊的疼的,就是獻子hou7上帝。查某子(戴嫌)獻做上帝的差用，就是康返先生娘。後生獻做上帝的奴僕，就是戴返(戴榮旋）牧師。

4. 仁愛和平：伊的做人，tui3內tui3外真圓滿。逐人都o-lo2伊的好女德，hou7子兒新婦真孝順。

5. Ai3祈禱：凡有tu2著大小事gau5倚靠上帝，交付伊推排。伊佇(1940年)3月初8日起病；佇3月15日早起就受主揀召轉去天父的家。Tng佇病真軟弱的時，iau2-ku2祈禱，求講：「主ah救我，主ah救我。」

鄙人照所知記chiah-的,真受感激。深望伊的遺族kap咱大家會學伊的好模範！！！