許篤禮撰 「數念故黃愛」 《台灣教會公報》802號，1955年10月）。

---

Ti7 1898 年，梅牧師（梅監務，Rev. Campbell N. Moody）kap林學恭牧師來溪湖佈道e5時，頭水e5果子謝九長老夫婦來接受道理，若是以前e5九長老娘是熱心敬神佛，食菜3、6、9。總是家內boe7平安，一個生，一個死；重、沖、thou2、煞；做偶像鬼神e5奴才。1899年正月初九天公生，kap hiah e5偶像斷絕，就信耶穌做主e5百姓。Ti7 1901年6月23日，36歲tui3甘為霖牧師（Rev. William Campbell）kap丈夫kang7日領洗禮入教，55年久做主盡忠e5女徒， gau5幫贊丈夫，thang講是模範e5信徒。論起伊e5

1. 信心。熱心守禮拜，除去重病以外，m7 bat無出席，祈禱會無論遠，近toe3到著，雖然70外歲也參加佈道隊，行8、9里路，透風、落雨行做頭前。做見証，唸聖詩，連會外也o-lo2 gau5唸詩。常常到三更暝半無厭sian7,走做前hou7少年人toe3 boe7著，tu2著好歹境遇，靠信心，常祈禱。

2. 疼心。對家內，對會內，會外gau5招呼，款待人一律平等。特別散hiong艱苦e5人gau5牽成， gau5看顧，對歷代傳教者無微不至，款待in親像家內e5人。

3. 事奉。tui3溪湖設教會每禮拜日，中晝煮飯負擔炊事e5責任，米、鹹、柴、油、鹽，若無夠，就是無分公、私提來補kah夠，續獻工煮hou7人食，m7是3、5年，就是到非常時配給米，無辦法thang koh繼續e5時才停止。清掃拜堂，逐項5工歡喜出力無挨推，向前拾去做。會友若有喪喜事，特別關心，kap歡喜e5人相kap歡喜，kap憂悶e5人相kap憂悶。生活儉樸，所有e5錢儉起來獻金，做教會e5路用，m7甘食，m7甘開，若為著教會盡力奉獻，言行一致，對人誠實。

4. 家庭。未信主e5時，hou7人看命，講伊食到34 歲，無扑算信耶穌食長歲壽，今年91歲。九長老87歲才離開世間，未信主e5時，一個生，一個死；信主了後，koh生4個查某子，招子婿，今內外孫118個，第4查某子kap子婿攏做長老，就是楊朝宗（在萬興開 四知堂醫院）、謝天足。In toe3序大人e5腳步，建設萬興教會，做教會元老。一個孫（謝定旺）獻身做傳道，一個孫新婦（李美玉，謝仁和妻）做女傳道。E昏早暗家庭禮拜，引chhoa7大細熱 心服事上帝。

5. 別世。病中，心真平安，有人替伊祈禱，伊反轉替人祈禱，ka7人安慰，也常常數念ai3 ti7離開世間以前，看見主e5榮光。果然最後安然講：「主耶穌接納我，」就真平安轉去祖家。Hit日，8月25日，隔日26，拜五；我iau2 ti7台南赴大會，hit日落大雨做水，若是溪湖好天，無熱，無寒，赴葬式e5人無一個沃著雨，真盛況，真嚴肅，遠近三百外人來參加。真thang感謝上主深恩，疼伊e5女婢。

以上寫chiah e5,極簡單來數念，若beh詳細來寫，穩當iau2有真濟伊e5美德thang hou7咱o-lo2 hou7咱數念，hou7咱學e5所在，bat伊e5人iau2真濟攏知，teh數念伊e5美德。 伊所ai3吟e5詩：天堂攏無苦難，永活無死。

九長老娘e5哀詞

Ah！先母受著召命來離世，平安離開阮逐家，伊e5奉事真正久，gau5疼傳道kap牧師；Tui3 ti兄姊真同情，著磨炊事攏無停；精神物質gau5援助， 序大、序細gau5招呼；為著教會來祈禱，苦勸家內著和好；伊所數念上代先，學恭、監務、蘭醫生；感謝三人gau5做工，

盡忠疼主kap別人；先母一生食苦苦，chhoe7 無甜甜thang換肚；Che是疼子kap疼孫，暝日無食kap無睏；伊e5疼痛真十全，離世hou7阮心真酸；伊e5享壽90歲，伊e5子孫百十八；阮今思念be7 tit過， 向望天堂koh聚會。孤哀子林開 揮淚頓首。