故黃李紡絲女士佇主後1968年8月23日上午7點受主揀召榮歸天城。享年71歲。紡絲女士是現任太平境教會的黃受惠長老的婦人人。

紡絲女士出世佇澎湖，是馬公教會的頭一個長老李杞的第二查某囝。李長老的家庭散赤，總是伊疼主的熱情佮信心實在贏過物質的困難。李長老用聖經佮信仰的經驗來教示伊的全家，予怹的內心攏有耶穌的神。

佇1911年宋忠堅牧師娘到馬公夏季的工作，發見著紡絲姊妹的天才佮品行，就共伊出獎學金，予伊來府城女學讀冊。佇學校的時，紡絲女士真受師長的愛護佮同學的欽仰，伊第二名來畢業女學。後來留佇學校做先生教冊。

以後伊佮黃受惠傳道師結婚，先後佇大肚佮鹽水教會做工5年久。黃傳道師做完5年的義務後，到日本進修齒科，佇彼中間，伊亦真苦心佇家，教囝鬥趁錢。也用彼個時間修完助產士的訓練。以後伊比伊的丈夫先倒轉來台南，趁錢寄予伊的丈夫完成學業。伊經過佇信心佮生活的苦鬥，訓練家己，幫贊丈夫佮家庭。

紡絲姊妹定居佇台南以後，做太平境教會的執事先後40年，來hoaN7財政的職務，伊對教會的貢獻實在真大。

雖然佇伊的肉體有帶心臟病的刺17年久，黃長老攏無半句的怨言，時時佇伊的身邊來照顧伊，予伊安心倒去主的厝。告別式佇8月27日下午2點，佇太平境教會，有300外人來赴會。