被加拿大政府kap教會懷念ê台灣人──侯書德牧師

 

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

盧俊義

原著載於自由時報2004620日第15

後由林俊育長老繙寫為漢羅體台語,收入於台語信望愛網站


有真chē外國宣教師kā in一生ê生命奉獻 hō台灣,連最後ê身軀也埋葬tī咱台灣,tī 淡水、台南 lóng thang看 tioh in ê 墳墓。In終生對咱台灣ê愛,每 pái 想起就 hō人感佩萬分,懷念不已。

咱台灣也有一位 hō 加拿大政府 kap 基督教會懷念ê傳教者,伊就是奉獻一生ê生命 hō 加拿大原住民印地安人ê侯書德牧師。

侯書德牧師是台南仕紳侯全成先生ê第二公子,也是台大醫學院病理學教授侯書文先生ê二兄。伊出身台南太平境長老教會,一九五一年成大建築系畢業。續落來到 加拿大去留學,卻m̄是繼續本科系ê研究,卻是到東部ê「諾克斯」神學院(Knox College)改讀神學。一九五八年畢業了後,被差派前往加拿大印地安人保留區投入傳道ê工作,這也是第一位台灣人tī加拿大獻身傳道事工ê工作者。

侯牧師被差派ê所在就tī安大略ê “Shoel Lake Reserve” ê印地安人保留區。會友四散各地,he是一個非常原始型態ê生活區域,無水、電、車、房舍,只有ê就是崎嶇ê山間小道。伊夫妻tùi一九五八年起,有兩年 ê時間tī chit地方工作,出門行山路,phāiⁿ有ná外出登山、露營ê裝備,訪問散居山地ê印地安人家庭,關心in,鼓勵in,並教育in。

一九六一年改派到 Mista Wasis、Crutwel、Wahpeton等三個印地安人保留區去傳道。無現代物質化ê生活環境中,單單tī每個禮拜日beh去chit三個地方帶領 印地安人禮拜,就必須ài tī天iáu未光就出門,直到深夜chiah ē-tàng tńg來到家己ê khiā家,有時tú-tioh大風雪,就 tioh停留到隔日。過ê生活,ná親像當地ê印地安原住民仝款,原始又koh簡陋,因為只有 án-ne chiah ē-tàng hō 當地印地安人願意kap in接近。

加拿大極北區ê印地安人有一個傳統習俗,每pái厝裡有親人去世,親朋好友就會相聚tī喪家,守護tī去世者ê身邊,in稱之為 “Take Wake”(也就是/咱所講ê「守靈」之意),連續三工三夜,家人同齊teh唱安靈詩歌、祈禱、講起故人ê各種故事,用chit種方式將去世親人ê一生重 複敘述出來,hō 喪家親人知影,hō大家 lóng koh-khah 認識過世ê親人。即使是tī氣溫零下四、五十度ê寒冬堙A侯書德牧師夫婦也lóng會陪伴tī chiah-ê被加拿大白人看成是「無業遊民」ê印地安人身邊,kap in同哀傷。Á當in平時外出phah獵有收穫tńg來ê時,也會kap in同齊跳舞、歡唱分享得tioh食物ê喜悅。

就án-ne,侯書德牧師tī加拿大印地安人保留區傳福音,一直到一九九二年五月一日,過了六十五歲生日了後無久去世,一生lóng奉獻 hō  chit 三個地區ê印地安原住民。

Tī 加拿大極北部 ê Mista Wasis、Crutwel、Wahpeton等三個印地安原住民特區,過去一百 gōa 年一直lóng無人去hia傳過福音,侯書德牧師是第一個接受派遣 去 chiah-ê 特區傳福音ê牧師;伊熱愛當地印地安原住民,tī侯書德牧師夫婦用心ê教導下,當地ê印地安人認真學習、改變生活態度,原本非常少有人讀 到高中ê青年,漸漸開始增加,並且 tī in夫婦努力溝通之下,加拿大政府也徵選高中畢業成績較優者,送入大學去接受專業教育。

一九八○年,伊ê母校諾克斯神學院為 tioh beh表示肯定伊tī印地安人北部保留區傳福音ê貢獻,特別頒發 hō 伊「神學博士」(Doctor of Divinity)學位,以感謝伊對印地安原住民福音事工上ê奉獻kap成就。

因為操勞而去世ê侯牧師,加拿大政府kap長老教會肯定伊tī印地安人地區奉獻宣教ê精神,一九九二年設立了「侯書德牧師紀念獎學金」,做為「補助高中教育」(Post Secondary Education)之用。這也是第一位tī加拿大留落來最美好足跡ê台灣人,值得咱懷念,也值得咱學習。

出身台南望族ê子弟,卻ē-tàng卑微家己、放落身段而終生獻 hō 加拿大極北偏遠地區ê印地安原住民,這若 m是父母有留落來真深厚ê宗教情操, 是無法度辦會到ê。

我想起第一位台灣人牧師高長tī臨終前對伊ê子女講ê話︰「我甚麼lóng無留 hō lín,只有 ê,就是留落來聖經上帝ê話;有上帝ê話作lín ê財產,生命就永遠bē缺乏。」

台灣人歡喜留財產 hō 子女,非常少留落來美好 ê 信仰腳跡 hō 後代,結果信仰一代不如一代,也因為 án-ne,chit一代擁有真 chē 財產 ê真 chē,心靈空虛ê卻是 bē 少。真可惜 ah﹗

 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述