歷史的的春令會 (1958年2月)

張逢昌撰 「歷史的的春令會」 《台灣教會公報》 832號 1958年 4月 p. 15-17 [原文是白話字]


春令會照所預定佇(1958年)2月19 下晡 ,佇長榮中學開始。今年的春令會是特別通記念有歷史的意義的會:第一,是起頭為著「農村青年」做中心來開。第二,是一切攏是自費,無受補助,家己出錢來開家己的會。第三,是人數是空前的,以前若是夏令會卻捌有遮濟人,若是春令會是猶毋捌有遮濟人。

咱的歷史佮力量已經閣進一步啦。起頭部會聚集teh 籌備的時驚了為著無補助,人數減少。總是結果毋但無減少,紲有意外的成績。這是表明T.K.C.已經有自覺咱的教會進步啦。

赴會人員攏總是男 163,女--的 90;共253名。照中會別來看,七星:男 6,女 5。台北:男 30 ,女 13。新竹:男 7,女 4。東部:男 2。台中:男 22,女 19,嘉義:男 58,女 31。台南:男 11,女 8。高雄:男 27,女 10。

開會禮拜是對會長梁炳元長老用今年的主題「活活的基督」來勉勵會員,後來就隨時有廖上池執事講「農業的進步,」通知這个會對起頭就色彩真明,只有愛為著農村來想,來講佮討論。每日下晡時的林玉田先生的「養豬法」,抑是周中根先生的 「養雞法,」攏是專家,閣毋是kan-ta理論,怹攏有實際經驗,所以所問佮所應答的,攏真有趣味閣有利益。

專題講演的頭一日,是鄭連坤牧師的 「農村基督化家庭的建設」,可惜佇春令會的一禮拜前,伊忽然間著狹心症,紲袂通擔當這个工,這通講是咱這班的會的大損失。總是佳哉有劉路得姑娘(Miss Ruth MacLeod)歡喜來代替鄭牧師,這也是咱通感謝的。第2日是陳柑果長老的 「農村佮傳道」的講演。伊雖是醫生,總是用伊實際的經驗來發表,真有力閣趣味。第 3日鄭錦榮牧師的 「農村教會佮音樂,」也是專家的指導佮發表,所以予大家真歡喜, 後來聽講有濟濟(很多)教會佇春令會後閣請鄭牧師去指導。按呢也通知會員對遮个講師實在有感服佮欽佩。

暗時有請詹添木長老來講起「農村衛生」佮陳明清長老來講「農村教育。」這兩位長老攏是專家,閣有信仰佮熱心,所以所講的予青年的印象佮教示也是無少。閣佇第2日也有得著英國母會的代表劉牧師(劉忠堅,Rev. Duncan MacLeod) 的教示。這是無拍算的收成。

為著欲應付農村青年的需要,所以所準備的內容佮咱平常所teh想的信仰生活,親像較無直接關係,致到佇屬靈的方面感覺較有欠缺。總是結果無甚物通掛慮,彼个大原因就是有每早起佮暗時的禮拜。早起時是郭東榮牧師,暗時是歐進安牧師。怹二位的牧師佇每早起佮暗時攏用真有力閣敬虔來chhoā青年佇上帝的面前來省察佮祈禱,所以致到予這个會也會充滿著靈氣。

以外也有得著濟濟位的小組指導者,抑是生活上替大家準備的役員,所以這个會才會通佇感謝佮感激的中間來結束。其中咱特別愛感謝的就是長榮中學的戴校 長(戴明福)以下諸位的先生,怹歡喜開放學校予咱用,閣應咱的利便不少。這真正是通數念的疼心,深深愛來感謝怹。

最後咱有予會員寫感想佮建議,我詳細teh 斟酌佮研究,其中也有濟濟大家攏承認的好處;不過無夠的所在也無少。我是向望會將遮个好處歸榮光上帝;也無夠的所在會做咱的教示,通予咱以後的會那久那進步。