甚物叫做青年週(明有德)

明有德 (Rev. Hugh MacMillan)撰 《台灣教會公報》 833號 1958年 5月 p. 17-18 [原文是白話字]


  1. 青年週的目的是teh記念咱教會內有設叫做「T.K.C.」的青年工作。這佇咱台灣教會歷史上是一个新的一頁;青年家己組織家己的會,揀家己的幹部,相佮指導、計畫家己著做的工作,也家己揀家己的人負責家己的工作,對家己的錢袋提 5 角銀來推動家己T.K.C.所著做的工;遮个佇台灣教會史上攏是新的事。咱一年一擺的青年週,就是特別好的機會欲予咱重新檢討過去,仰望將來光明的路來進步的。

  2. 有濟濟(很多)人袂明甚物叫做「基督教。」有的掠做這个是禮拜日的宗教。怹看基督徒禮拜日去做禮拜,親像其他的宗教佇節日去廟裡燒金一樣。其實基督教毋是按呢。所以咱應該著將基督的精神,實行佇六日的生活裡。聖經的第一本(創世記)也是記載,爸上帝佇六日的中間,流汗做工創造宇宙;佇第七日歇睏,來計畫佇欲來七日的工。耶穌也捌講「我的爸行代誌到今,我也行代誌」(約翰5:17)。

  3. 每擺咱的青年週,攏是佇Easter (復活節) 的後面。Easter是記念主耶穌閣活,所以咱通叫青年週做「復活週。」咱「活活的基督」(The Living Christ),這欲予咱的青年週的意義閣較深;就是講咱T.K.C. 的會員無論佇日常生活上,佇工作中,佇園裡,佇工廠,佇辦公務的時,抑是佇運動的時,佇學校佮朋友交陪的時,抑是佇家庭,應該著佮活活的基督相佮做工, 並且將伊介紹予毋捌的人,通來幫贊怹接受主。現在有真濟青年陷佇失意的苦境,怹的路是烏暗的,所以怹若會通佇T.K.C會員的身上,來看見活活的基督的時,怹欲得著勇氣來克服一切的痛苦,也欲佮恁相佮呵咾上帝的榮光。活活的主講,「佇世間恁有苦難,獨獨恁通放心,我已經khah贏世間」(約翰16:33)。