|
◎陳俊宏原著
林俊育繙寫。
原著刊於《台灣教會公報》 2614期
2002年4月7日
中文版
台語版（漢羅）刊於《台灣公論報》葡萄園
第177及178期
賴永祥教授kap筆者素昧平生，過去kan-ta有兩pái接觸lóng是由伊「先發」。第一pái大約是tī一九九四年筆者移民加拿大chìn前，伊突然tùi美國波士頓寫phoe來索取家族信仰背景資料；第二pái是2001年底，伊再次來信探詢有關馬偕牧師（George
Leslie MacKay, 1844∼1901）故鄉巡禮事宜。
雖然素昧平生，但是賴教授所出身ê基隆長老教會，卻是筆者所出身七堵教會ê「母會」，而且伊ê母親賴葉長老是筆者外祖母張廖樣當年「入教」ê熱心牽線人之一，因為具備了chit種親過血緣關係ê信仰淵源，訪談一開始，便百無禁忌，海闊天空暢所欲「問」起來，賴教授竟然mā不失其謙沖為懷，而知無不言，言無不盡。
信仰生活：：奶母宣教師ê居中引線
賴永祥是tī五歲左右tòe父母遷居基隆，經由厝邊黃仔春所僱ê一位奶母來接觸tio̍h福音，十五歲ê時kap母親tàu陣tùi基隆教會牧師葉金木hia領洗禮來成做基督徒。Hit位奶母宣教師當年大概做夢mā無想tio̍h，伊竟然帶領了一對不平凡ê母kiáⁿ信主。
葉金木牧師是馬偕ê末屆（1900年畢業）學生，當年是教會界中ê一名領導人物。有可能因為年齡上ê差距，賴教授年輕ê時，顛倒kap後來來基隆教會鄭君芳傳道師khah熟悉。鄭傳道師hit種安分守己ê涵養，hō͘
in賴教授日後工作生涯立了一個影響相當深遠ê楷模。
七堵教會便是鄭牧師tī基隆教會任內開拓成立ê一個果子。賴教授ê母親賴葉當年不時探訪七堵教會初代ê慕道友，對筆者外祖母tī信仰上ê開導，koh-khah是投入了oh得估計ê心血。
生涯奇遇 陰錯陽差，同名賴永祥受累
第二次世界大戰結束後，賴永祥tùi日本東京大學學成返鄉，因為讀ê是法律，phah算藉tio̍h執教台北高校ê機會，tī國際法上鑽研，因此買落來當年台大日籍教授山下康雄所收藏整套ê《國際公法》，準備以此做為學術生涯ê起步。如果m̄是東京大學前輩，當時是伊鄰居ê朱昭陽（1903∼2002）ê一再使弄，soah轉任其當年所創台灣人自辦ê第一間大學「延平學院」（1946）ê話，賴永祥後來可能成做台灣人當中ê第一位國際法學者，因為彭明敏hit時iáu未出道leh！
延平學院開校ê時，賴永祥擔任ê是地理課程，上了一學期ê課了後，便發生「二二八事件」（1947），學院隨時奉令關閉。為tio̍h維持教職員ê生計，賴永祥受命經營附設ê「台灣美術工藝社」，利用已向政府申請tio̍h
ê檜木、烏心石等珍貴木材，製造高藝術品質ê傢俱來變賣，以幫忙補貼學院ê開銷。Chit-ê工藝社tī一九五一年結束營業，賴永祥chiah轉任台大圖書館，依照伊ê講法，chit種工作khah-bē引人注目，因為事件發生後，像伊chit種東大畢業ê台籍人士莫名其妙失蹤ê
iáu時有所聞neh！
一九四九年十月間，賴教授有一工tī台北中山堂附近tú-tio̍h一位朋友名許乃昌，伊起gōng-gia̍h講：「無gōa久前chiah聽tio̍h一則消息講賴永祥已遭逮捕，你怎樣iáu
tī chia？」聽tio̍h
chit-ê警告了後，賴教授mā
chiah知好thang
bih起來一段時間，chiah敢去台大就任新職。後來chiah知影有一位同名者受累被捕。
Hit位被捕ê賴永祥tī真chē年了後ê一個婚禮宴席當中，竟然奇蹟tek
kap已當了台大圖書館學系系主任ê賴永祥坐tī同桌，因為同名同姓，兩人mā就寒喧了起來，賴教授chiah知影hit位bat
tī中國大陸經商，自嘆運命不濟ê賴永祥到hit時iáu
m̄知家己被捕ê原因，學者賴永祥當然mā無kā
hit-ê因同名之累ê商人賴永祥講hō͘伊成做代「禍」羔羊ê可能性。Koh-khah妙ê是，賴教授後來tùi鄭廷憲（無教會主義者）所編ê
Shalom（希伯來語ê平安）通訊上koh看tio̍h
hit位賴永祥ê消息，知影伊已經到教會慕道亞à。
因為經歷了chit項奇遇，賴教授日後tī蔣經國tú開始提拔本土才俊之時，tú好被選為淡水工商管理專校（今真理大學ê第一個前身，1965年創立）ê董事長，mā
chiah知所警惕，因此tī任命了葉能哲博士（葉金木之孫）為校長（1971）了後，無久，便赴美就任哈佛大學哈佛燕京圖書館要職，直到退休（1995）。
值得一提ê是，筆者tī讀了《朱昭陽回憶錄》（台灣文庫26，1994）了後發現，朱昭陽竟稱延平學院開設「工藝社」ê時，是伊首請王白淵來負責營運（頁155∼163），就chit點筆者bat大膽向賴教授求證，伊tī電話中哈哈大笑講朱校長年歲已大，有可能m̄-tio̍h，口氣中kah-ná一點á無認為m̄-tio̍h。這話講完無jōa久，朱校長tī
2002年元月廿八日以百歲高齡去世了。
根據賴永祥ê記憶，事實上是tī伊離開延平學院了後，王白淵chiah接任工藝社ê職務，但只是安插性質ê閒缺。當初tī向筆者敘述hit段往事ê時，賴永祥並無「順續」提起《朱昭陽回憶錄》中hit件白紙烏字ê「賴」冠「王」戴。
學養功夫 編訂《中國圖書分類法》，嘉惠國內外中文圖書館
賴永祥教授是台大圖書館學系ê創辦者（1961），這是人盡lóng知ê事，但是伊不居首功，創系三年後chiah擔任第二代系主任。
賴教授根據中國金陵大學劉國鈞教授（1899∼1980）ê基本結構，所發展而成ê《中國圖書分類法》，到taⁿ已廣為國內外中文圖書館所採用，伊tī
2001年九月將此分類法增訂八版付梓了後，tī第九版以後無條件授權hō͘國家圖書館（原中央圖書館）繼續修訂來嘉惠圖書館界。
賴教授當年（1951）到台大任職後無久，便kap陳漢光先生、楊雲萍教授、曹永和先生等人創辦《台灣風物》，到taⁿ已經有五十年歷史，是台灣史學界中歷史siōng悠久ê一份權威性期刊，賴教授早年不時tī
chit份刊物發表有關台灣歷史ê論文，特別是以明鄭時期ê部分著作，ē-sái講是當年鄭成功研究ê先進。
賴教授自謙m̄是歷史專業，但是伊治史ê功力kap成就已經無tī一般歷史家之下，tùi伊近十年來所撰寫ê《教會史話》六百則內容來看，tī
chit方面實在已經無出其右，á名講是史話，實在有真chē
lóng是學術性考據之作矣！如第99則〈1865年五月〉hit篇確定了馬雅各醫師頭pái抵台，登陸打狗（高雄）ê日期是五月廿九日，這是一項意義重大ê考據，因為chit工m̄-nā是馬醫師tī台灣南部宣教ê開始，同時也thang算是台灣基督長老教會宣教史上ê第一日。講到賴教授tī史料、文獻上ê掌握，則是碧落黃泉，隨手捎來。
舉例來講，伊tī《教會史話》第二輯裡提起《台灣島之過去kap現在》（The
Island of Formosa, Past and Present, 1903）ê作者，bat擔任美國駐淡水領事ê
James W. Davidson時，以一個台灣人從來m̄-bat使用過ê漢譯名「達飛聲」稱之（頁44），李春生教授（1838∼1924）bat以台語音譯之為「禮密臣」，á一般則譯做戴維遜、達維遜、大衛森、迭畢特遜等多種，因此筆者請教伊這譯名得自何處，伊一屑á
to無思考回答講：Daviason當年mā
bat tī中國大陸當過外交官，hit時官方所用ê統一譯名便是「達飛聲」，這外籍人士統一漢譯名冊是由一位廈門大學ê老教授提供hō伊ê,筆者toh是kā伊講亦bat
tī溫哥華「達飛聲」ê女兒厝裡，tùi一份當年伊ê父親寫hō͘美國國務院ê一張phoe裡，看tio̍h伊向上司報告講伊ê中文譯名將改做「達飛聲」。Tùi
chit件小事來看，賴教授ê學問之博、之精絕m̄是虛傳。
編教會史 十幾年來，耕耘再耕耘
賴永祥自1950年代後期開始投入了教會歷史ê編修工程，伊m̄-nā以圖書館學專業知識豐富了《台灣基督長老教會百年史》（1965）ê內容，近十幾年來koh-khah以《台灣教會公報》為園地耕耘出六百則，每則一千字ê《教會史話》（已經五百則編成五輯，第六輯mā
teh-beh問世）。
按照賴教授家己ê解釋，《教會史話》並m̄是狹義ê傳道史，伊講：
「基督教tī台灣ê傳播，對台灣ê社會、風俗、文化、經濟、政治等各方面lóng有廣泛ê影響，mā有互動ê關係；有可能過去ê教會史偏重ê是傳道者soah忽略了受容者，所以我意圖tī本地人ê間加chhōe史料。」
伊mā引用前台大校長傅斯年，mā是伊ê老上司ê一句名言：「上窮碧落下黃泉，動手動腳找東西」，來勉勵歷史工作者tī史料ê蒐集上ài下真功夫，chiah有原創性ê貢獻。
講到tùi宣教傳道ê「受容者」來多方面chhōe各種資料，譬如初代信徒家譜、家書，以及地方教會ê施洗、會議紀錄等ê蒐集kap整理，賴教授tī
chit方面以身作則，用心之苦，用力之深ē-sái講是無孔不入、無堅不透ê地步loh。但是，如何tī
hiah-chē「受容者」ê資料當中，篩選整理出有意義ê,或是有用處ê部分kā伊詮釋，並且選擇tī適當ê時機kā伊發表，做為見證真理ê器皿，to̍h就另當別論loh。賴教授撰寫史話，顯然學術本位，力求客觀，但tī無所為而為中，亦見有為，m̄-nā
án-ne,伊mā為基礎史學立下了標準ê作業模式。
結語 塑構乙部台灣新史頁
賴教授ê主要興趣kap使命感，顯然iáu是tī教會歷史，tùi伊年輕時就tī台北高等學校代表性刊物《台高》上，發表了一篇長達廿四頁ê論文《耶路撒冷初期教團概述》而榮獲日本開國2600年紀念獎chit件事，便thang瞭解伊為什麼ē-tàng
tī退休了後竟然十gōa年kah-ná一日，每一個禮拜寫出一篇以家己動手動腳chhōe-tio̍h
ê原始資料整理而成ê《教會史話》來。
《台灣基督長老教會百年史》tī
1965年出版了後，便無看tio̍h增補，á其《歷史年譜》情形koh-khah慘，1945年了後ê記事竟chhut-chāi伊留白，這是有違背普世長老教會一向重視文獻ê傳統精神kap教制成規ê。
賴永祥教授個人長期默默耕耘本土歷史所累積ê豐碩成果，kám-m̄
to̍h是未來教會編輯近史ê活石元素？kám
m̄是將來塑構一部台灣新史ê時所應當採錄ê一部分真材實料？
|
