賴永祥長老史料庫 （ Elder John Lai's Archives ）

盧賞撰 「設教紀念佮台南永樂教會」《台灣教會公報》 786號 1954年6月 p.16-17。原文是白話字。

按 1917年5月27日太平境教會太平境教會在台灣設教發祥地看西街分設說教所於聖教發祥地之看西街，1939年正式成立分會，稱「永樂教會 」。

 這間教會是佇看西街，現時改做仁愛街。咱俗語講，「食果子拜樹頭，挽瓜揪藤。」今仔日福音遍傳佇台灣南部逐所在，彼个起頭就是對看西街傳起。按呢現時永樂教會是咱台灣基督教的發祥地。欲寫台灣基督教史，的確著對遮寫起的。

八十九年前（1865年）的6月16日起，老馬醫生佮杜嘉德牧師，以及廈門三个同工的兄弟佇 遮開始醫療傳道，暝日為主做工，宣講福音。怹至誠的心感動天，無久就得著故高長先生來信主 (這是高金聲牧師對我講-的)。後來教會受窘逐，才徙去旗後。高先生就佮怹去旗後幫贊怹。通講伊是台灣頭一粒的果子。又閣廈門三个同工佮馬醫生做陣來台灣的中間，一个名黃嘉智，伊的囝孫現時佇看西街teh做事業。伊通講是台灣信仰3塊火星的一塊。

今6月第3禮拜是設教的紀念日。確信每間教會攏欲來數念當時老馬醫生怹受窘逐佮怹做工的困難，佮怹的犧牲以及怹怎樣忍苦耐勞，通來加添咱搶救人的靈魂的熱。同時阮也愛介紹現時教會佇遮的消息，通做咱數念的伴手。

這條街是古早細條街路，濟濟人毋知位，連市內的人有的都來揣無拜堂，何況外位來的。安慕理牧師 （Rev. Boris Anderson）捌來遮做主理，伊有所感覺著的講，永樂教會有3項的特色：- (1) 逐擺teh禮拜傳教者向偶像teh說教，因為講台對面的厝有chhāi偶像。(2)真鬧熱，teh禮拜的時常常有囡ná真濟大細聲嚷來嚷去，買賣的人叫來叫去；車馬 khìn-khòng叫；實在真攪擾，說教者聲量若較細聲的，坐後壁的人攏無聽見。(3)真熱，拜堂是古早ê商行，雙爿攏是店，無法度通開窗仔，熱天一下到，ná teh piak-pa，禮拜的人坐teh都teh流汗，何況講道者，請恁想像就會知。阮已經較慣勢，總是若外位來遮禮拜，或是來講道的，至少欲予怹蹛真鬧熱佮真熱的等路轉去。監督太平境建堂的賴其昌長老來看了就講，「恁永樂的兄姊真gâu吞忍。」老實是一年忍過一年，100人來看，100人以上講，永樂教會著起。近來有人知阮有欲移轉建築，若拄著，攏問講，佇時欲起？

今感謝主！阮佇幾nā年前有計畫欲移轉建築。到佇存--年佮舊年，耶和華已經有賞賜阮312坪的地，阮攏買清楚，閣也攏登記落財團法人了；地佮厝以及一切的費用，共開15萬外。對佇舊年尾就進入佇第二階段，就是積立建築金；到今年4月尾，已經有4萬外；這間舊拜堂和會已經通過欲賣，大約6萬，按呢約有10萬的建築金垃。

以上看起來，永樂教會是設教紀念禮拜堂。這是南台基督教歷史上通做鐵證的，閣南大（南部大會）訂每年6月第3禮拜做設教紀念日，是對遮算起--的。旗後禮拜堂是巴克禮博士，台南太平境是馬醫生，現時女學新築的禮拜堂是杜姑娘，等的紀念禮拜堂。咱永樂是南台設教的紀念禮拜堂是無通異議的。現時阮有所感激的，就是佇 市內有別間教會的這个老長老，現時是85歲，聽見永樂教會欲移轉建築，對以前就真歡喜將伊所趁的恭敬提來奉獻予主，已經幾nā百，佇5月3號，閣親身提100箍，歡歡喜喜來奉獻做建築金，提予我，講，這是上帝賞賜的，實在真感謝主。

今阮預定上慢是明年的正月就欲動工，撿彩較早也無的確。列位兄姊，我確信恁若數念永樂教會，就會想著主疼咱到怎樣，差伊忠實的奴僕來咱台灣為主phoe命。今老馬醫生佮杜牧師以及彼三个同著磨的，現時佇天裡做雲teh圍咱，咱若致意疼佇怹受窘逐的教會，是teh洗怹早時的見笑佇眾人的面前，又閣也會大大安慰怹早時的艱苦。怹看教會佇遮teh進步，也欲大歡喜佮快樂；怹的確欲報告佇主的面前，予主也無恬恬。主的確欲徛起來講，我已經teh得勝佇看西街垃。

請列位疼主的兄姊，大向望恁看這間永樂教會做親像恁家己的；請恁來學彼个85歲的老長老，歡喜相佮來建築設教紀念禮拜堂。（盧賞）