賴永祥長老史料庫 Elder John Lai's Archives

艋舺教會沿革

(北部中會) 常置「教會歷史地理部會」記 《台灣教會公報》588 期 1934年 3月 p..25-26 [原文是白話字] 部會員:郭水龍、陳瓊琚、柯設偕

艋舺教會(現在是佇台北市,若竹町,3町目,17番地)。是1877年12月(光緒3年)所創設的。
北部設拜堂所拄著的第一困難的所在,就是艋舺拜堂。彼時中國官對百姓通知講,若是將厝,稅外國的宣教師,就欲嚴嚴刑罰。偕牧師佇1887年(明治 10年),來艋舺稅一間厝,也將「耶穌聖教」的匾,吊佇彼間厝的入口。無外久,有予對遐過去的武官看著,也彼暗,兵隊長有講彼位的地是屬佇軍營,所以受逼,姑不將佇隔日離開遐。
彼時偕牧師有受百姓暴民hiat石頭,hiat瓦,不止受侮辱,總是伊攏無忍膽,彼暗落去淡水河邊的大龍峒,佮學生演說了後,佇暗暝的中間閣倒轉來艋舺。彼時有一間厝,夜燈的光對縫仔照出來。
偕牧師到彼間厝,也託一个老歲仔(按「教務教案檔」,名陳永順),佇前草店尾街十字路附近,稅一間草厝,也隔日早起將聖堂的匾閣吊起來。
街民真受氣,艋舺3大姓:黃,吳,林的代表者(頭人) 和齊哄喝偕牧師,講的確欲趕伊出佇街外,也煽動百姓,所以到第3日有拆拜堂厝,地基攏拍歹。也幾若千的百姓包圍偕牧師,喝講,「刣,刣。」也官也強制要求著離開,所以姑不將暫時離開閃避。
彼時有對淡水的英國領事司格卓 (官方作司格達,其全名是Benjamin Charles George Scott,職務是駐淡水英國署副領事)見事機不妙,再度前來艋舺,對福建道台抗議,所以道台有召艋舺的有力的頭人。欲問,頭人真驚,有對淡水廳長請替設法和解。 到尾,有提出損害賠償,閣新起拜堂佇拆歹彼个位,也承認偕牧師的傳教。
偕牧師有共人挽喙齒(拔牙齒),對佇百姓的歹感情出力除去。反對漸漸無去,也漸漸來信基督教的真濟。
三,四年後,有佇八甲庄 (就是現在的位置)買較闊的土地,起蓋瓦的拜堂。
總是佇1885年,明治18年,清法戰爭生起,台灣也受影響。法國的戰船來台灣,遮的百姓真受氣,謠言講,宣教師佮基督徒共謀佮法國連絡。佇戰爭起 的時,北部台灣較好的7間拜堂,有受暴民的攻擊拍歹。彼時艋舺拜堂也受著拍歹佮搶the̍h,也有死傷。大部分的信徒四散--去。閣年,和議成立的時,偕牧師有對彼時清國政府,巡撫劉銘傳,賠教會被害的賠償金一萬箍,將一部分閣再起,有懸塔的禮拜堂。
後來彼間拜堂有舊閣歹去,所以閣開一萬三千箍,改築,就是現時這間拜堂。大正13年,1924年夏天有完工。大正15年(1926年),是艋舺教會 設教50週年,也佇3月14日,有舉行紀念祝賀式,不止濟人來赴。

此網站由李秀卿女士撰寫程式建置並義務作維護。如果您對本網站有任何建議或指正之處,請 聯絡我們。謝謝!

Copyright (C) 2007 年1月 [賴永祥長老史料庫 ]
修訂日期: 2016 年 02 月 25 日