劉主安 奉獻的果子(長榮女學紀念日)

劉主安撰 《台灣教會報》 806號 1956年2月 p.4 為長榮女學紀念日寫的 原文是白話字。

佇70 外年前,咱母會的女宣道會有濟濟人獻金 做海外宣道的路用,閣有三位宣教師,就是朱約安姑娘 (Miss Joan Stuart), 文安姑娘 (Miss Annie E. Butler) 佮萬真珠姑娘 (Miss Margaret Barnett) 獻身過來台灣。怹 到位開始工作了後,無久就感覺用基督教教育女子的必要。就創設一間女學校佇台南的新樓內。這就是現在長榮女子中學的的起頭, 佇1887年2月14日開校, 到 今有69年的歷史。
當時入學的資格佮 條件真簡單,只有留腳就可以。雖然án-ni,因為一般的人看輕女子的教育,真少人beh來讀,開校彼年,學生只有 19名。起初開辦的時陣,學校招生真困難,閣有其他濟濟艱苦。總是大家犧牲苦心有價值,無久學生愈 加添。到佇 盧仁愛姑娘 (Miss Jeanie A. Lloyd) 做校長的時代,就感覺校舍無夠額大thang 收容攏總的學生。就計畫起新校舍佮提高學生的水準。佇1923年,得著母會 佮 島內有志的獻金,約6 萬箍,就佇東門外 買3 甲的土地,約8000 坪, 閣 建築現在的的校舍, 到今有38年久。這個校地當時一坪只有一角銀,若是現在是價值有300 箍。
佇15年前有濟濟校友獻金約2500 箍。當時龔瑞珠先生極力主張用這筆錢買土地來做學校抑是校友會的路用。就佇學校的隔壁買500 坪的土地。兩年前有起杜雪雲姑娘 (Miss Sabine E. Mackintosh) 紀念禮拜堂佇這個所在。這塊地當時一坪 4 箍銀,若是現在變做一坪 300箍的價值。
南部大會有指定每年2月第二禮拜日做女學的特別記念日。佇這日各教會的禮拜獻金 beh用做女學的路用。舊年渡咱教會的獻金計共約有10000箍。學校利用這個獻 佮其他的錢款買一疋土地,約1600坪,佇學校的隔壁。無拍算兩月日後,市政府發表beh 佇 附近起100間 的國民住宅,所以附近的土地就起價到一坪約250 箍。
過去所拄chiah 的事實予我常常想著耶穌所講一句話,就是「見若為著我的名來獻的,攏beh得著 60倍, 100 倍的收成。」
以上所記的,攏是關係物質-tek 的事。物質上 的收成雖然m̄-thang忽略,若是精神-tek 的利益是閣-khah大要緊。過去70年久的中間,佇本校畢業的學生約有3500名。Chiah 的的校友的中間濟濟人,現時佇教會,家庭佮社會teh活動奉事。最第一寶貝的,就是有濟濟人起頭入學 的時陣, m̄知真活的上帝, m̄ bat耶穌佮伊的福音。總是佇學校的中間得著道理的教示,得著耶穌做怹生涯的指導者, m̄-nā本身得救,bat活命的真理,也閣 轉去了後有引導 怹的家族佮親戚朋友來歸主,佇怹的生活中有平安,有幸福,有奉事的快樂,閣對將來有永遠活的希望。這就是過去70年久,佇學校濟濟先輩獻身努力的果子。閣 也是有咱教會濟濟疼主的兄弟姊妹為著學校獻金,獻時間,獻本身犧牲的 結果。 逐年佇創設紀念日(2 月 14日) 的時,攏會想著chiah 的人來感謝上帝,感謝怹犧牲奉事的精神。
Taⁿ今年2月第二禮拜日是咱教會為著本校的特別記念日。向望會閣得著濟濟兄姊的同情。今年度的教會獻金是beh用做建築紀念米真珠姑娘 (Miss Margaret W. Beattie) 的 圖書館的費用。請大家多多援助,閣 時常為著本校來祈禱。是心所願。