羅安娜(Anna Ross,1848-1933)

 

 

柯設偕撰 「羅安娜過世」《台灣教會公報》586號, 1934年1月 p.28 原文是白話字。


羅安娜 (Mrs.Anna D. Ross)佇本年(1933年)9月6日,有受上帝揀召過世,享受85歲。羅安娜是偕(偕叡廉)先生娘(偕仁理,Jean Ross Mackay)的老母,也佇無幾年前,佇70歲的時有來台灣,踮佇伊的查某囝-就是偕先生娘的厝年半久,也佇彼中間,伊有教育宣教師的囝兒,(小可親像學校的款)。閣伊的冊,有一本捌翻譯白話字-就是陳能通先生所翻譯彼本「上帝的戰甲。」所以佮咱台灣的教會有緣故佇teh,愛寫淡薄伊的傳。

羅安娜,佇1848年出世佇英國。老父姓中堅,是牧師(Rev. J. Duncun),也伊是第二查某囝。也伊6歲的時,in父母有搬去加拿大Ontario 省。也伊的老父猶原做長老會的牧師佇遐。

羅安娜有卒業衛斯理女子高等學院,也卒業了,紲受揀做彼間的先生。

佇1874年,伊有佮羅牧師(Rev. John. Ross)合婚。也伊的丈夫佇1887,有受上帝揀召過世,有留 6的囝兒。伊的丈夫過身了後,伊有教冊佇Clinton的學校,也後來有Toronto女宣教師養成學校初代的校長,也佇1900年有做Ottawa長老會女子高等學院的校長。

伊真敬虔,熱心,也出力鼓舞幫贊教會的事。也有著濟濟冊,也有寫佇濟濟款的雜誌。閣也有設濟濟位的祈禱會。閣再伊是佇1876年,組織女宣道會的組織者的一个。

羅安娜是真熱心佮徛在的長老會的信徒。總是伊的信仰,有予攏總屬佇基督的逐款教會所尊敬。

伊過身佇伊一个查某囝的厝,也伊的葬式有舉行佇彼所在,一間長老會的拜堂,也逐教派的牧師:路得派,聯合派,聖公會的牧師攏有來赴,彼个街市佮庄堛漱H攏表出追悼的心。

伊的生涯,通講是讀聖經,祈禱佮奉事教會的生涯。