Sù-tô͘ lāu-lâng tâm-lūn kiâⁿ Thiⁿ-lō͘ 

---

Góa chêng ti̍t-tio̍h chi̍t ê bāng, bāng-kìⁿ Ki-tok-tô͘ lī-khui Chiong-bông siâⁿ, keng-kè chōe-chōe gûi-hiám ê lō͘-chām, āu-lâi kàu Thiⁿ-siâⁿ. Hit sî chiong chit ê tāi-chì lâi kì tī chheh nih thang hō͘ lâng khòaⁿ, sī ha̍p góa ê sim-ì, iā ōe hō͘ lâng tit-tio̍h lī-ek. Tng Ki-tok-tô͘ khí-sin kiâⁿ lō͘, hit sî i ê ke kòan lóng m̄ khéng kap i khì； chóng-sī i m̄-káⁿ iân-chhiân, in-ūi kiaⁿ-liáu tiàm Chiong-bông siâⁿ ōe bia̍t-bô, só͘-í lī-khui in, ka-kī kín-kín khì. Chit ê tāi-chì í-keng kóng-liáu.

Hit sî liáu-āu, i ê bó͘-kiáⁿ si̍m-mi̍h khóan, góa tī chia bô thang thàm-thiaⁿ, koh chiah kú ū chōe-chōe sū chó-tòng, bô êng thang khì in hia； taⁿ ū ki-hōe thang kàu in ê só͘-chāi. Lī in tau saⁿ sì lí lō͘ ū chhiū-nâ, góa tī hia teh khùn, koh bāng-kìⁿ.

Bîn-bāng tiong khòaⁿ-kìⁿ chi̍t ê lāu-lâng, miâ kiò To-tì, tùi góa sin-piⁿ kè, góa khòaⁿ i kap góa kiâⁿ siāng-lō͘, góa chiū khí-lâi kap i saⁿ-kap kiâⁿ. Kiâⁿ lō͘ ê sî, nn̄g-lâng saⁿ-kap tâm-lūn, tú-tú kóng khí Ki-tok-tô͘ só͘ keng-kè ê sū. Góa mn̄g lāu-lâng kóng, Lāu-tōa ah！ hí ē-bīn tò-chhiú-pêng e siâⁿ kiò si̍m-mih miâ？

To-tì kóng, Hit ê chiū-sī Chiong-bông siâⁿ； siâⁿ lāi-gōa, lâng-gia̍h put-chí chōe, m̄-kú pháiⁿ hong-sio̍k, koh pîn-tōaⁿ.

Góa chiū kóng, Góa ia̍h phah-sǹg sī hit ê siâⁿ, chêng chi̍t pái, góa bat tùi hia kè, chai lí só͘ kóng ê, heh sī ū iáⁿ.

To-tì kóng, Chin khó-lîn！ góa ài beh kóng i ê hó, nā-sī tio̍h chiàu sit kóng.

Góa kóng, Lāu-tōa ah！ góa khòaⁿ lí chin hó só͘ kiâⁿ, tek-khak ài thiaⁿ hó ê tāi-chì, iā ài kóng i. Chá chêng sio̍k c